Arunachal Pradesh Mega Dam Project On Siang River : ચીનના વિશાળ ડેમને ટક્કર આપવા ભારત સરકારે મેગા પ્લાન શરુ કરી દીધો છે. સરકારે અરુણાચલ પ્રદેશમાં સિઆંગ નદી પર એક વિશાળ હાઇડ્રોપાવર અને જળ-સુરક્ષા પ્રોજેક્ટનું કામ શરુ કરી દીધું છે. રિપોર્ટ મુજબ પ્રોજેક્ટ હેઠળ ભારતનો સૌથી મોટો અને લગભગ 280 મીટર ઊંચો બંધ બનાવવામાં આવી શકે છે. પ્રોજેક્ટથી 11200થી 11600 મેગાવોટ વીજળી ઉત્પન્ન કરવાનો ટાર્ગેટ છે, પરંતુ તેનો મુખ્ય ઉદ્દેશ વીજ ઉત્પાદન નહીં, પરંતુ ચીનની જળ-નીતિનો જવાબ આપવાનો છે.
ચીન બ્રહ્મપુત્રા નદી પર બનાવી રહ્યો છે વિશાળ ડેમ
વાસ્તવમાં ચીન તિબેટના યારલુંગ ત્સાંગપોમાં બ્રહ્મપુત્રા નદી પર વિશ્વનો સૌથી વિશાળ ડેમ બનાવી રહ્યું છે, જેને ભારત માટે ‘વોટર બોમ્બ’ સમાન કહેવામાં આવી રહ્યું છે. રિપોર્ટ મુજબ જો ચીન અચાનક પાણી રોકે કે છોડે તો ભારતને મોટું નુકસાન થઈ શકે છે. જો તેઓ અચાનક પાણી છોડશે તો સિયાંગ નદીનો સંપૂર્ણ વિનાશ થઈ શકે છે. ડેમની અસર માત્ર અરુણાચલ પ્રદેશમાં જ નહીં, આસામને પણ મુશ્કેલીમાં મૂકી શકે છે.
આ પણ વાંચો : ‘…તો જમ્મુ-કાશ્મીરને રાજ્યનો દરજ્જો મળી ગયો હોત’, CM ઓમર અબ્દુલ્લાના ભાજપ પર પ્રહાર
ભારતનો સૌથી મોટો બંધ સુરક્ષા કવચ સાબિત થશે
અરુણાચલમાં તૈયાર કરવામાં આવી રહેલા પ્રોજેક્ટને રાષ્ટ્રીય સુરક્ષાના પગલા તરીકે જોવામાં આવી રહી છે. અધિકારીઓનું માનવું છે કે, ચીનના વિશાળ બંધનો સામનો કરવા માટે ભારતે પણ બંધ બનાવવો જરુરી છે. જો ચીન અચાનક પાણી રોકે કે છોડે, તો ભારતે બનાવેલો બંધ પૂર કે દુષ્કાળ જેવી પરિસ્થિતિઓ પર કંટ્રોલ મેળવી શકે છે, જેથી બંધ એક સુરક્ષા કવચ સાબિત થઈ શકે છે.
CM પેમા ખાંડુએ ચીનના બંધને વોટર બોમ્બ ગણાવ્યો
અરુણાચલ પ્રદેશના મુખ્યમંત્રી પેમા ખાંડુએ ચીનના બંધને વોટર બોમ્બ ગણાવ્યો છે. તેમણે એમ પણ કહ્યું છે કે, ચીનનો બંધ આદિવાસી સમાજના અસ્તિત્વ પર ખતરો ઊભો કરી શકે છે. ચીને અત્યાર સુધી કોઈપણ આંતરરાષ્ટ્રીય જળસંધિ પર હસ્તાક્ષર કર્યા નથી, જે જોખમ ઘટાડવા મામલે પારદર્શિતાનો અભાવ છે. તેમના રાજ્યના મંત્રી ઓજિંગ તેસિંગે દાવો કર્યો છે કે, લગભગ 70 ટકા સ્થાનિક લોકો આ પ્રોજેક્ટના સમર્થનમાં છે, જ્યારે કેટલાક લોકોમાં અજ્ઞાનતા હોવાથી વિરોધ કરી રહ્યા છે.
આ પણ વાંચો : ભારતમાં સાઇબરક્રાઇમમાં 31%નો ઉછાળો, NCRBના આંકડાઓ ચોંકાવનારા
