Jamnagar Accident : જામનગર શહેરના કાલાવડ નાકા વિસ્તારમાં આવેલા આરબ જમાતખાના નજીક ગત મોડી રાત્રે બે મોટરસાયકલ વચ્ચે અકસ્માત સર્જાયો હતો. અકસ્માતમાં બે યુવકોને ઇજા પહોંચતા સારવાર માટે જી.જી. હોસ્પિટલ ખાતે ખસેડવામાં આવ્યા હતા.
મળતી માહિતી મુજબ પૂરઝડપે આવી રહેલા એક બાઇક પર સવાર બે નશામાં ધૂત શખ્સોએ અન્ય મોટરસાયકલને ટક્કર મારી હતી. અકસ્માતના પગલે આબેદી મીનાણી અને શકીલ મીનાણી નામના બે યુવકો ઇજાગ્રસ્ત બન્યા હતા. બનાવ બાદ આસપાસના સ્થાનિક લોકો દોડી આવ્યા હતા અને ઇજાગ્રસ્તોને તાત્કાલિક સારવાર માટે સરકારી જી.જી. હોસ્પિટલ ખાતે ખસેડ્યા હતા. સાથે જ નશાની હાલતમાં હોવાનું જણાતા બંને બાઇકચાલકોને ઝડપી પાડી સિટી ‘એ’ ડિવિઝન પોલીસને સોંપવામાં આવ્યા હતા. પોલીસ દ્વારા સમગ્ર મામલે વધુ તપાસ હાથ ધરવામાં આવી રહી છે.
