Jamnagar Liquor Smuglling : જામનગરની લોકલ ક્રાઈમ બ્રાન્ચની ટીમેં ચોક્કસ બાતમીના આધારે સોયલ ટોલનાકા પાસે વોચ ગોઠવી કારની અંદર બનાવેલા જુદા જુદા 8 ચોર ખાનામાં સંતાડેલો 562 નંગ નાની ઇંગ્લિશ દારૂની બોટલોનો જથ્થો કબજે કરી લઇ બે આરોપીઓની અટકાયત કરી છે. અને રૂપિયા 5.67 લાખની માલમત્તા કબજે કરી લીધી છે.
જામનગરની લોકલ ક્રાઈમ બ્રાન્ચની ટીમને ચોક્કસ બાતમી મળી હતી, કે જામનગરના જ વતની બે શખ્સો દ્વારા એક કારમાં અલગ અલગ ચોરખાના બનાવીને તેમાં ઇંગ્લિશ દારૂની બોટલોનો જથ્થો સંતાડી જામનગર શહેરમાં ઘુસાડવામાં આવી રહ્યો છે, જે બાતમીના આધારે ગઈકાલે સાંજે સોયલ ટોલનાકા પાસે વોચ ગોઠવી હતી, જે વોચ દરમિયાન જીજે 27 સી.એમ. 5787 નંબરની બ્રેઝા કાર પસાર થતાં સફેદ કલરની બ્લેક પટાવાળી કારને એલસીબીની ટુકડીએ રોકી હતી, અને તેની તલાસી લીધી હતી.
જે તલાસી દરમિયાન પ્રથમ દ્રષ્ટિએ કશું મળ્યું નહતું, પરંતુ એલસીબીની ટીમને ચોક્કસપણે બાતમી મળી હતી, કે કારની અંદર અલગ અલગ ચોર ખાનાઓ બનાવ્યા છે. જેથી કારચાલકની જીણવટભરી પૂછપરછ કરતાં આખરે કાર ચાલકે કબુલાત કરી લીધી હતી, અને પોતે કારમાં જુદા જુદા 8 સ્થળે ચોરખાના બનાવી લીધા છે, અને તેમાં ઈંગ્લીશ દારૂની બોટલોનો જથ્થો સંતાડીને જામનગર લઈ જઈ રહ્યા છે.
પોલીસ દ્વારા તેઓ પાસે ચોર ખાના ખોલાવતાં કારના ચારેય દરવાજા કે જેને ડિસમિસની મદદથી ખોલાવીને ચેક કરાવતાં તેની અંદર સંતાડેલી નાની ઇંગ્લિશ દારૂની બોટલોનો મોટો જથ્થો મળી આવ્યો હતો. તે ઉપરાંત કારની પાછળની ટેઈલ લાઈટ કે જે લાઇટને ખોલ્યા બાદ તેની અંદરના ખાંચામાં પણ ઇંગ્લિશ દારૂની નાની બોટલોનો જથ્થો સંતાડ્યો હતો. જ્યાંથી પોલીસે ખોલાવીને બહાર કાઢ્યો હતો.
આ ઉપરાંત કારના ડેસ્કબોર્ડ અને ડ્રાઇવિંગ સીટની નીચેના ભાગમાં અલગ અલગ 8 સ્થળે 562 નંગ ઇંગ્લિશ દારૂની બોટલોનો જથ્થો સંતાડેલો હતો, જે તમામ દારૂ પોલીસે કબજે કર્યો હતો. તેમજ કારના ચાલક જામનગરમાં હર્ષદ મિલની ચાલી પાસે રહેતા અક્રમ મોહમ્મદ મકરાણી (ઉંમર વર્ષ 35) તેમજ તેના સાથીદાર સાધના કોલોનીમાં રહેતા બીપીન સોમાભાઈ ચાવડા જે બંનેની પોલીસ દ્વારા અટકાયત કરી લેવામાં આવી હતી, જ્યારે તેઓ પાસેથી 562 નંગ ઇંગ્લિશ દારૂની બોટલો, બે નંગ મોબાઈલ ફોન, અને કાર સહિત 5,67,200 ની માલમતા કબજે કરી લીધી છે.
ચબરાક દારૂના ધંધાર્થી સામે સતર્ક એલસીબીની ટીમ
જામનગરમાં દારૂના ધંધાર્થીઓ પોલીસની નજરથી બચવા માટે નીત નવા નુસખાઓ અપનાવીને દારૂને ઘુસાડવાની પ્રવૃત્તિ કરે છે, તેવા જ દારૂના ધંધાર્થીઓની સામે એલસીબીની ટીમ વધારે સતર્ક બની છે, અને દારૂના ધંધાર્થીઓની કારીગીરીને બહાર લાવી દીધી છે.
કોઈને પણ ધ્યાન ન પડે, તે રીતે કારમાં અલગ અલગ 8 ચોરખાનાઓ બનાવીને દારૂ ઘુસાડવાનો પ્રયત્ન થયો હતો, પરંતુ એલસીબીની ટિમને ચોક્કસ બાતમી મળી હતી, અને તેઓએ પૂરેપૂરી સતર્કતા દાખવી હતી, અને આખરે એક કારની અંદર સંતાડેલો 562 નંગ જેટલો નાની બાટલીનો જથ્થો એક પછી એક બહાર કાઢી લીધો હતો.
