Jamnagar Ganja Smuggling : જામનગર શહેર અને જિલ્લામાં નશાકારક ચોકલેટના વેચાણ અંગે એસ.ઓ.જી ની ટીમે ત્રણ સ્થળે દરોડા પાડ્યા બાદ નશીલા પદાર્થ ગાંજાના વેચાણનું નેટવર્ક પકડી પાડવા માટે કમર કસી હતી, અને ગઈકાલે જામનગર તાલુકાના સિક્કા ગામમાંથી એક શખ્સને ઝડપી લીધો છે, અને તેની પાસેથી નશીલા પદાર્થ ગાંજાનો જથ્થો કબજે કરી લીધો છે. જ્યારે તેની પુછપરછ દરમિયાન મહારાષ્ટ્રના સપ્લાયરનું નામ ખુલ્યું છે
જામનગરની એસ.ઓ.જી. શાખાની ટુકડી નશાના નેટવર્કને નેસ્ત નાબુદ કરવા માટેની વિશેષ ઝુંબેશ ચલાવી રહી છે, જેના ભાગરૂપે ગઈકાલે જામનગર તાલુકાના સિક્કા ગામમાં દરોડો પાડવામાં આવ્યો હતો, અને ચોક્કસ બાતમીના આધારે નસીલા પદાર્થ ગાંજાના વેચાણનું નેટવર્ક શોધી કાઢ્યું હતું.
સિક્કામાં શ્રીજી સોસાયટી વિસ્તારમાં રહેતો સાજીદ જુસબભાઈ સુંભણીયા નામનો શખ્સ કે જે બહારથી નશીલા પદાર્થ ગાંજાનો જથ્થો આયાત કરીને તેનું ખાનગી રીતે વેચાણ કરી રહ્યો છે, જે બાતમીના આધારે ગઈકાલે મોડી રાત્રે એસ.ઓ.જી. ની ટુકડીએ દરોડો પાડ્યો હતો. જે દરોડા દરમિયાન સાજીદ સુંભણીયા કે જેના કબજામાંથી એક કિલો અને 350 ગ્રામ ગાંજાનો જથ્થો મળી આવ્યો હતો. તેથી પોલીસે નશાકારક ગાંજો અને મોબાઈલ ફોન વગેરે સહિત રૂપિયા 18,500 ની માલમતા કબજે કરી લીધી છે, અને આરોપી સાજીદ સામે સિક્કા પોલીસ મથકમાં એનડીપીએસ એક્ટની કલમ 8(સી), 20(બી), 2(બી), 29 મુજબ ગુન્હો નોંધી પૂછપરછ હાથ ધરી છે.
જે પૂછપરછ દરમિયાન તેણે ઉપરોક્ત ગાંજાનો જથ્થો મહારાષ્ટ્ર રાજ્યના ધુલિયા વિસ્તારના રતન મોહન મોરે નામના શખ્સ પાસેથી મેળવ્યો હોવાનું કબુલ્યું હોવાથી પોલીસે તેને ફરાર જાહેર કરી તપાસનો દોર મહારાષ્ટ્ર સુધી લંબાવ્યો છે.
