Surat : સુરત શહેરની પાણીની જરૂરિયાતને ધ્યાને રાખીને પાલિકા દ્વારા તાપી નદીમાં ઈન્ટેકવેલની કામગીરી કરવામાં આવી રહી છે. સરથાણા વિસ્તારમાં આ કામગીરી ચાલી રહી છે ત્યારે પાલિકાના વિપક્ષે એક તરફનો ભાગ નમી ગયો છે અને આ ઈન્ટેકવેલના સ્ટ્રકચરને તાત્કાલિક ચેક કરવા માટેની માંગણી કરી છે. જોકે, પાલિકા તંત્રએ એવો દાવો કર્યો છે કે આ નદીમાં થતી કામગીરી છે અને પાણીના વહેણના કારણે ઘણી વખત માટી કે રેતી ઉપર નીચે થાય છે તેથી આવું થઈ શકે છે. આ ટેકનીકલ છે તેથી લેવલ કરવામાં આવશે કોઈ મોટો ઈસ્યુ નથી.
સુરત શહેરની પાણીની જરૂરિયાતને ધ્યાને રાખીને સુરત પાલિકા દ્વારા તાપી નદીમાં ઈન્ટેકવેલ બનાવવામા આવે છે. આ ઈન્ટેકવેલની કામગીરી સરથાણા વિસ્તારમાં ચાલી રહી છે ત્યાં પાલિકાના વિપક્ષના કેટલાક કોર્પોરેટરો-નેતાઓ પહોંચ્યા હતા અને ઈન્ટેકવેલની દિવાલ એક તરફ નમી ગઈ છે જેથી આ ઇન્ટેકવેલનું તાત્કાલિક સ્ટ્રક્ચરલ સ્ટેબિલિટી ચેક કરાવવામાં આવે તેવી માંગણી કરવામાં આવી છે. તેઓએ એવો આક્ષેપ કર્યો હતો કે અહી ઘણી ટેકનીકલ ખામી જોવા મળી છે યોગ્ય સંભાળ રાખ્યા વગર કામકાજ શરૂ કરવામાં આવશે તો આ સ્ટ્રક્ચર સુરત શહેરને કામમાં આવશે નહીં તેવી વાત કરવા સાથે પગલાં ભરવાની વાત કરી છે.
જોકે, બીજી તરફ પાલિકાના હાઇડ્રોલિક વિભાગે એવો દાવો કર્યો છે કે જ્યારે નદીના પાણીમાં આ પ્રકારની કામગીરી કરવામાં આવે છે ત્યારે પાણીના વહેણના કારણે કામગીરી થતી હોય તેની નીચે માટી કે રેતી વહે છે. આ કિસ્સામાં એક તરફ માટી-રેતી વહી છે તેથી એક તરફનો ભાગ નીચે નમ્યો છે. જોકે, આ કામગીરી હાલ માત્ર ચારથી પાંચ ફૂટ જેટલી જ થઈ છે અને આ ઈન્ટેકવેલ 25 ફૂટ નીચે જશે અને આ પ્રકારનું થાય છે ત્યારે કુવા ફરતેનું લેવલ વારંવાર કરવામાં આવે છે, આ ટેકનીકલ કારણ છે તેવું કહીને ક્લીન ચીટ આપી દીધી છે.
