Dadra and Nagar Haveli Car Accident: કેન્દ્ર શાસિત પ્રદેશ દાદરા અને નગર હવેલીના મુખ્ય મથક સેલવાસના ઉલ્ટન ફળિયામાં ગત બુધવારે રાત્રે એક ગમખ્વાર અકસ્માત સર્જાયો હતો. પૂરઝડપે આવી રહેલી એક કારે રોડ ક્રોસ કરી રહેલા 18 વર્ષના યુવકને જોરદાર ટક્કર મારી હતી. આ અકસ્માતમાં યુવકને માથા અને શરીરના અન્ય ભાગોમાં ગંભીર ઇજાઓ પહોંચતા તેનું ઘટનાસ્થળે જ કમકમાટીભર્યું મોત નીપજ્યું હતું.
ઉશ્કેરાયેલા ટોળાએ કારને આગ ચાંપી?
અકસ્માતને પગલે આસપાસના લોકો તાત્કાલિક દોડી આવ્યા હતા અને વાતાવરણ તંગ બની ગયું હતું. ઘટના બાદ અચાનક કારમાં આગ લાગતા અફરાતફરી મચી ગઈ હતી. સ્થાનિક લોકોમાં એવી ચર્ચા છે કે, યુવકના મોતથી ઉશ્કેરાયેલા ટોળાએ કારને આગ ચાંપી દીધી હતી. જો કે પોલીસના જણાવ્યા અનુસાર કારમાં અચાનક આગ લાગી હતી.
આ પણ વાંચો: ડિજિટલ ગુજરાતના દાવાઓ વચ્ચે રસ્તો ભૂલી ગયેલી RTO વેબસાઇટ: 2026માં પણ 2023નો ડેટા!
કાર ચાલકની ધરપકડ
ઘટનાની જાણ થતા જ પોલીસનો કાફલો અને ફાયર બ્રિગેડની ટીમ સ્થળ પર પહોંચી ગઈ હતી. ફાયર વિભાગે આગ પર કાબૂ મેળવ્યો હતો, પરંતુ ત્યાં સુધીમાં કાર બળીને ખાખ થઈ ગઈ હતી. સ્થાનિક લોકોએ કાર ચાલકને પકડીને પોલીસને હવાલે કર્યો હતો. પોલીસે આ મામલે કાર ચાલક વિરુદ્ધ ગુનો નોંધી તેની ધરપકડ કરી છે અને અકસ્માત તેમજ આગ લાગવા પાછળના ચોક્કસ કારણો જાણવા વધુ તપાસ હાથ ધરી છે.
