અમદાવાદ,શનિવાર
એસ જી હાઇવે પર આવેલી નિરમા યુનિવર્સિટીમાં નોકરી કરતા કર્મચારીએ યુનિવર્સિટીમાં જમા કરવામાં આવતા નાણાં પૈકી પાંચ કરોડ રૂપિયા જેટલી માતબર રકમ બનાવટી ચલણ બનાવીને અન્ય એકાઉન્ટમાં બારોબાર જમા કરાવીને છેતરપિંડી આચરી હોવાની ફરિયાદ સોલા પોલીસ મથકે નોંધવામાં આવી છે. આ કેસમાં યુનિવર્સિટીના કર્મચારી સહિત અન્ય છ આરોપીઓની સંડોવણી હોવાનું સામે આવ્યું છે. આ અંગે સોલા પોલીસે વધુ તપાસ શરૂ કરી છે.
નિરમા યુનિવર્સિટીમાં મેનેજમેન્ટ વિભાગમાં એસોશીએટ પ્રોફેસર તરીકે કામ કરતા નિકુંંજભાઇ પટેલે નોંધાવેલી ફરિયાદની વિગતો એવી છે કે નિરમા યુનિવર્સિટીમાં વિદ્યાર્થીઓની ટેલેન્ટ નાઇટ, રમત-ગમત, તેમજ વિવિધ પ્રવૃતિઓ માટે એડવાન્સમાં નાણાં લઇને તે નિરમા યુનિવર્સિટીની કાલુપુર બેેંકની બ્રાંચમાં જમા કરવામાં આવે છે. વિદ્યાર્થીની ટર્મ પૂરી થતા નાણાં પરત કરવામાં આવે છે. આ નાણાંની ચુકવણી કરવા માટે પ્રકાશ ઠાકોર (રહે. વીજળી કર્મચારીનગર, ચાંદખેડા) નામના કર્મચારીને જવાબદારી સોંપવામાં આવી છે. જે વાઉચર તૈયાર કરીને કમિટીના બે સભ્યોની સહી કરાવીને નાણાં પરત આપે છે. ગત ૧૦ સપ્ટેમ્બરના રોજ આ હિસોબોનું ઓડિટ કરવાનું હોવાથી ઓડીટર પાસે જવાનું હતું. પરંતુ, પ્રકાશ ઠાકોર અન્ય કોઇ કારણ આપીને હાજર રહ્યો નહોતો. ત્યારબાદ બીજા દિવસે પણ હાજર ન રહીને બહાનું આપ્યુ હતુ અને તે યુનિવર્સિટીની ઓફિસમાં આવ્યો ગતો અને તેણે મેનેજમેન્ટ સમક્ષ ચોંકાવનારી કબુલાત કરી હતી કે નાણાંની જરૂર પડતા તેણે કમિટી મેમ્બરની બનાવટી સહી કરીને બોગસ વાઉચર બનાવીને તેમના જાણીતા લોકોની વિગતો મેળવીને તેમના એકાઉન્ટમાં નાણાં ટ્રાન્સફર કરીને પાંચ કરોડ રૂપિયાની ઉચાપત કરી હતી. આ અંગે સોલા પોલીસે ગુનો નોંધીને તપાસ શરૂ કરી છે.
