Panchmahal News: પંચમહાલ જિલ્લાના ગોધરા તાલુકાના કાંકણપુર પોલીસ મથકમાંથી જ લોકરક્ષક અને કાયદાના રક્ષકો પર સવાલ ઉઠાવતી ચોંકાવનારી ઘટના સામે આવી છે. કાંકણપુર પોલીસ મથકમાં જપ્ત કરાયેલા વિદેશી દારૂના મુદ્દામાલમાંથી લાખો રૂપિયાની ઉચાપતનો પર્દાફાશ થતાં સમગ્ર પોલીસ બેડામાં ભારે ચકચાર મચી ગઈ છે. પોલીસ સ્ટેશનમાં જ હોમગાર્ડ/GRD તરીકે ફરજ બજાવતા એક જવાન સામે આ મામલે કાયદેસરનો ગુનો દાખલ કરવામાં આવ્યો છે.
શું છે સમગ્ર મામલો?
મળતી માહિતી અનુસાર, કાંકણપુર પોલીસ મથકે અલગ-અલગ પ્રોહિબિશનના ગુના હેઠળ ઝડપેલા વિદેશી દારૂનો જથ્થો મુદ્દામાલ તરીકે રાખવામાં આવ્યો હતો. આ જપ્ત કરાયેલા મુદ્દામાલમાંથી અંદાજે 15.20 લાખ રૂપિયાની કિંમતનો વિદેશી દારૂ બારોબાર સગેવગે કરી દેવામાં આવ્યો હોવાનું સામે આવ્યું છે. આરોપ છે કે, અહીં જ જી.આર.ડી. તરીકે ફરજ બજાવતા નરેન્દ્ર બારિયા નામના જવાને આ લાખો રૂપિયાનો દારૂ બુટલેગરોને વેચી માર્યો હતો.
આ પણ વાંચો: સુરેન્દ્રનગરમાં રૂ. 75.28 કરોડનું કૌભાંડ: પંચરની દુકાન ચલાવતા શ્રમિકના નામે પત્રકારે આચરી છેતરપિંડી
પોલીસ મથકના કમ્પાઉન્ડ અને આસપાસના સીસીટીવી (CCTV) ફૂટેજ ચેક કરવામાં આવતા આ સમગ્ર કૌભાંડનો પર્દાફાશ થયો હતો. ફૂટેજમાં સ્પષ્ટપણે જોઈ શકાય છે કે, જપ્ત કરાયેલો વિદેશી દારૂનો મોટો જથ્થો ઈકો કારમાં ભરીને સ્થળ પરથી લઈ જવામાં આવી રહ્યો હતો. આ પુરાવાના આધારે ઉચ્ચ અધિકારીઓની સૂચનાથી ત્વરિત કાર્યવાહી કરવામાં આવી છે.
મુદ્દામાલની ઉચાપત મામલે કાંકણપુર પોલીસે પોતાની જ કચેરીના GRD જવાન નરેન્દ્ર બારિયા સામે ગુનો નોંધી તેની સામે કડક કાર્યવાહી હાથ ધરી છે.
