Kalol Derol Underpass : પંચમહાલ જિલ્લાના કાલોલ તાલુકાના ડેરોલ રેલવે સ્ટેશન નજીક એક રેલવે અંડરપાસનો કેટલોક ભાગ તૂટી પડતા સ્થાનિક લોકોમાં ભારે રોષ જોવા મળી રહ્યો છે. આ અંડરપાસના વચ્ચેના ભાગે સિલિંગનો કેટલોક ભાગ અચાનક તૂટીને નીચે પડ્યો હતો, જેના કારણે વાહનવ્યવહાર બંધ કરી દેવામાં આવ્યો છે. સદભાગ્યે, આ ઘટના સમયે અંડરપાસમાંથી પસાર થઈ રહેલી ચાર જેટલી મહિલાઓનો આબાદ બચાવ થયો હતો, જેના કારણે કોઈ જાનહાનિ થઈ ન હતી.
તંત્રની બેદરકારીનો આક્ષેપ
સ્થાનિક લોકોએ આ ઘટના માટે રેલવે તંત્રની બેદરકારીને જવાબદાર ઠેરવી છે. તેઓનો આરોપ છે કે મુંબઈ-દિલ્હી વચ્ચેના આ મહત્વના રૂટ પર 24 કલાકમાં 140 જેટલી ટ્રેનોની અવરજવર થાય છે, જેના કારણે અંડરપાસના એક તરફનો ભાગ બેસી ગયો હતો. આ અંગે રેલવે વિભાગને વારંવાર રજૂઆતો કરવા છતાં કોઈ ધ્યાન આપવામાં આવ્યું ન હતું. સ્થાનિકોએ વધુમાં જણાવ્યું કે રેલવે તંત્ર દ્વારા બેદરકારી છુપાવવા માટે તૂટેલા ભાગ પર આરસીસી (RCC) ચોંટાડવામાં આવ્યું હતું, જે આજે તૂટી પડ્યું છે. આ ઘટના બાદ પણ તંત્રનો કોઈ અધિકારી સ્થળની મુલાકાતે આવ્યો નથી.
વાહનવ્યવહાર બંધ, માત્ર રાહદારીઓને મંજૂરી
સુરક્ષાના કારણોસર હાલમાં આ અંડરપાસને વાહનવ્યવહાર માટે બંધ કરી દેવામાં આવ્યો છે. માત્ર રાહદારીઓને જ પસાર થવાની મંજૂરી આપવામાં આવી છે. આ મહત્વના માર્ગ પર વાહનવ્યવહાર બંધ થવાથી લોકોને ભારે હાલાકીનો સામનો કરવો પડી રહ્યો છે. આ ઘટનાએ ફરી એકવાર રેલવે તંત્રની બેદરકારી અને સુરક્ષાને લગતા મુદ્દાઓ પર પ્રશ્નો ઊભા કર્યા છે, અને સ્થાનિક લોકોમાં આ બાબતે ભારે રોષ ફેલાયો છે.
