આરોપીને બચાવવા પોલીસ સ્ટેશનમાં રાજકીય આગેવાનોના ધામા
સગીરાને ભગાડી જનાર આરોપીને ગુનો નોંધ્યા વગર જવા દેવાયો હોવાનો પાટડી પોલીસ પર આક્ષેપ
સુરેન્દ્રનગર: પાટડીમાં પોક્સોના કેસના આરોપીને ઝડપ્યા બાદ પોલીસે કાર્યવાહી ન કરી હોવાની ચર્ચા ઉઠી છે. આ ઉપરાંત પોલીસે ગુનો નોંધ્યા વગર જવા દેવાયો હોવાનો પાટડી પોલીસની કામગીરી સામે સવાલો ઉઠયા છે.
પાટડી પોલીસ મથક હેઠળના એક ગામથી વિરમગામનો યુવક અમિત કાળુભાઇ ઠાકોર અંદાજે ૧૫ વર્ષની સગીરાને લલચાવી ફોસલાવી ભગાડી ગયો હતો.
આ મામલો પાટડી પોલીસ મથકે પહોંચ્યો હતો અને પાટડી પોલીસે અપહરણ કરનાર યુવક અને સગીરાને બે દિવસ પહેલા ઝડપી પાડયો હતો. પરંતુ મોડી રાત સુધી આ મામલે પોલીસ મથકે રાજકીય આગેવાનોનો જમાવડો જોવા મળ્યો હતો અને પાટડી પોલીસ દ્વારા આરોપીને છોડી મુકવામાં આવ્યા હોવાનું ચર્ચાઈ રહ્યું છે.
આ બનાવ દરમ્યાન પાટડી પોલીસ મથકના ઈન્ચાર્જ પીઆઈ ઉપાધ્યાય પણ હાજર હોવાનું સામે આવ્યું છે આમ પોક્સો જેવા ગંભીર ગુનાઓના આરોપીને પોલીસ દ્વારા છોડી મુકવામાં આવતાં ક્યાંકને ક્યાંક પોલીસની કામગીરી સામે પણ અનેક સવાલો ઉઠી રહ્યાં છે. આ મામલે ઉચ્ચકક્ષાએથી કાર્યવાહી કરવામાં આવે તેવી પણ માંગ ઉઠવા પામી છે.
