– બોરસદ ખેતીવાડી બેંકનું 1.66 લાખનુ દેવું બાકી છતાં દસ્તાવેજમાં બોજો દાખલ કરી દેવાયો
– કોઈ લેણું ન હોવાનું ફડચા અધિકારીએ દસ્તાવેજમાં લેખિત માહિતી આપી હતી
આણંદ: બોરસદના પામોલ ગામમાં ૩૫ વર્ષ જૂના તમાકુ સહકારી મંડળીના ગોડાઉનને આણંદ જિલ્લા રજિસ્ટારના ફડચા અધિકારી દ્વારા સબ રજિસ્ટ્રાર કચેરીએ વડોદરાના અંગત મળતિયાના નામે ૨૦૧૯માં દસ્તાવેજ કરી દેવામાં આવ્યો છે. બોરસદ ખેતીવાડી બેંકનું ૧. ૬૬ લાખનું દેવું બાકી હોવા છતાં દસ્તાવેજમાં બોજો દાખલ કરીને દસ્તાવેજ કરી દેવામાં આવ્યો છે. તેમજ શરત ફેર અને હેતુફેર કરવા માટે ગ્રામ પંચાયતની કોઈપણ પૂર્વ મંજૂરી વિના પોતાના અંગત મળતિયાઓને દસ્તાવેજ કરી આપ્યો હોવાથી દસ્તાવેજ રદ કરવા અને નોંધણી નહીં કરવા માટે લેખિત અરજી પણ ગ્રામ પંચાયત કરી હતી. દસ્તાવેજ રદ કરવા માટે બેંકના લીગલ વિભાગ સાથે સંકલન કરીને આગામી દિવસમાં નોટિસો આપવાની કામગીરી બેંક દ્વારા કરાશે.
શરત ફેર અને હેતુફેર કરવા માટે ગ્રામ પંચાયતની કોઈપણ પૂર્વ મંજૂરી વિના મળતિયાઓને વેચાણ દસ્તાવેજ કરી અપાયો, દસ્તાવેજ રદ કરવા માટે બેંક કચેરીને નોટિસ અપાશે
બોરસદના પામોલ ગામમાં ૧૯૮૯ માં ખેડૂતોના વિકાસ માટે તમાકુ ફેડરેશનની રચના કરવામાં આવી હતી. પામોલ ગામના ખેડૂતોના કૃષિ ઉત્પાદન અને તમાકુના કામકાજ સંદર્ભે પામોલ પંચાયત પાસે જમીન માગવામાં આવી હતી. જે જમીનમાં ૧૯૯૮માં ૪૦૮.૧૭ ચોરસ મીટર બાંધકામ ગ્રામજનોએ લોક ભાગીદારીનો ફાળો ઉઘરાવીને કર્યું હતું અન તમાકુ ખરીદવા અને વેચવાનું કામ મંડળી દ્વારા શરૂ કરાયું હતું.
જે મંડળીના ચેરમેન અરવિંદભાઇ પટેલનું અવસાન થયા બાદ મંડળીમાં કામગીરી બંધ થઇ ગઇ હતી. આણંદ જિલ્લા સહકારી મંડળીના રજિસ્ટાર દ્વારા ૧૯.૨.૨૦૧૬ના રોજ મંડળીને ફડચામાં લઇ જવાનો ઠરાવ કરવામાં આવ્યો હતો. આણંદના ફડચા અધિકારી દ્વારા ૨૬.૦૪.૨૦૧૮ના રોજ પામોલની તમાકુ મંડળીના મકાનની હરાજી યોજવામાં આવી હતી અને ૧૧.૫૦ લાખમાં વડોદરાના જીગર હનીસ ભટ્ટને મંડળીનું મકાન વેચાણ આપીને બોરસદ સબ રજિસ્ટાર કચેરીમાં તા. ૪.૨.૨૦૧૯ના રોજ દસ્તાવેજ નં.૨૬૩થી ફડચા અધિકારી અતુલકુમાર કાંતાલાલ વાઘેલાએ દસ્તાવેજ કરી આપ્યો હતો. પેટલાદના કનેયાભાઇ મિસ્ત્રી અને વડોદના વિક્રમસિંહ સોલંકીએ સાક્ષી તરીકે સહી પણ કરી હતી.
જે દસ્તાવેજની નોંધણી માટે ગ્રામ પંચાયતમાં કાગળો મોકલવામાં આવતા તા. ૪.૮.૨૦૧૯ના રોજ દસ્તાવેજની એન્ટી ના મંજૂર કરી હતી. ગામના સરપંચ દ્વારા ગ્રામજનનોને પામોલ તમાકુ મંડળીનું મકાન બારોબાર વેચાઇ ગયું હોવાની જાણ કરવામાં આવતા ગ્રામજનોએ સહી ઝુંબેશ કરીને બોરસદ માલમતદારેને ૪.૮.૨૦૧૯ના રોજ લેખિત અરજી કરી હતી. અરજીમાં જણાવ્યુ હતું કે, ફડચા અધિકારી દ્વારા ગામની મિલક્ત મનસ્વી રીતે હડપ કરીને ગોડાઉનનો પંચાયત અને સભાસદોને જાણ બહાર દસ્તાવેજ કર્યો છે. જે શરત ફેર અને હેતુફેર કરવા માટે ગ્રામ પંચાયતની કોઇપણ પૂર્વ મંજૂર વિના પોતાના અંગત મળતિયાઓને દસ્તાવેજ કરી આપ્યો હોવાથી રદ કરવામાં આવે અને નોંધણી નહીં કરવા માટે માગણી કરી છે. આગામી દિવસોમાં ગ્રામજનો દ્વારા દસ્તાવેજ રદ કરવા માટે સિવિલ કોર્ટમાં દાવો કરવાની પણ તૈયારીઓ શરૂ કરવામાં આવી રહી હોવાનું ગ્રામજનોએ જણાવ્યું છે.
– ગ્રામ પંચાયતમાં હરાજીની નોટિસ બજાવવામાં આવી નથી : ગ્રામજનો
પામોલના ગ્રામજનોના જણાવ્યા મુજબ, ફડચા અધિકારી દ્વારા જે હરાજી રાખવામાં આવી હતી તેની ગામ પંચાયતમાં કોઈપણ જાતની નોટિસ આપવામાં આવી હતી નહીં અને પંચાયતમાં હરાજીની તારીખ તથા સમય સંદર્ભે તમામ ગામને અંધારામાં રાખવામાં આવ્યા હતા અને બારોબાર હરાજી કરી દેવામાં આવી હતી. ગામજનોને હરાજી સંદર્ભે કોઈ જાણ કરાઈ ન હતી અને જો જાણ કરાઈ હોત તો પામોલના ગ્રામજનો પોતે હરાજીમાં ભાગ લઈને ગામની સંપત્તિ ખરીદવા પણ તૈયાર હતા.
– મંડળીએ લોન લીધી હતી અને મંડળીનું દેવું ચૂકતે કરાયું છે : ફડચા અધિકારી
ફડચા અધિકારી અતુલકુમાર વાઘેલાએ જણાવ્યું હતું કે ૨૬.૪.૧૮ ના રોજ હરાજી યોજવામાં આવી હતી.જેની ત્રણ અખબારમાં જાહેરાત પણ આપવામાં આવી હતી. મંડળીએ ગુજરાત સ્ટેટ ટોબેકો ફેડરેશન પાસેથી લોન લીધી હતી જેથી તેની રિકવરી માટે મંડળીના મકાનની હરાજી કરીને લોનના નાણાં વસૂલ કરાયા છે અને મંડળીનું તમામ દેવું પણ આ રકમમાંથી ચૂકતે કર્યું હતું જેમાં બોરસદ ખેતીવાડી બેંકનું દેવું પણ ચૂકતે કર્યું હોવાનું અધિકારીએ કબુલ કર્યું હતું.
– બોરસદ ખેતીવાડી બેંકનું રૂપિયા ૧.૬૬ લાખનું દેવું બાકી છે : મેનેજર
બોરસદ ખેતીવાડી બેન્કના મેનેજર સંદીપ પટેલે જણાવ્યું હતું કે પામોલ તમાકુ મંડળીએ ૨૨.૨ .૧૯૯૩ ના રોજ ૧.૪૯,૫૦૦ ની લોન લીધી હતી. જે ૧૬ હપ્તાની લોન હતી તેમાંથી ૧૩ હપ્તા ભરાયા હતા અને ૨૦૦૬ ના સાલમાં માત્ર ૩૦,૧૮૬ રૂપિયા બાકી પડતા હતા જે આજરોજ વ્યાજ સાથે ૧.૬૬ લાખની રકમ થઇ છે. ખેતીવાડી બેંકે પોતાની લોન સામે પામોલ પંચાયતમાં બોજો ૨૨.૨.૧૯૯૩ ના રોજ પામોલ પંચાયતનાના રેકોર્ડમાં દાખલ થયેલો છે.
– વડોદરાના જીગર ભટ્ટ સાથે માત્ર ૧૧.૫૦ લાખનો સોદો કરાયો
આણંદ જિલ્લા ફડચા અધિકારી દ્વારા હરાજીમાં વડોદરાના જીગર ભટ્ટ સાથે ૧૧.૫૦ લાખનો પામોલની મંડળીનું વેચાણ કરાયું હતું. જેમાં જીગર પટેલ ૧,૦૦,૦૦૦ ચેકથી ૨૫.૪.૧૮ તથા દસ લાખ રૂપિયા ચેકથી તા.૧૭.૫.૨૦૧૮ અને ૧૫,૦૦૦ તા.૪.૨. ૨૦૧૯ ના રોજ સરકારી ચલણથી રોકડા ફડચા અધિકારી આણંદને ચૂકવ્યા હતા.
