શહેરના ગોત્રીમાં ઈલેક્ટ્રીક બસ ટર્મિનલ પ્રોજેક્ટના પ્રથમ તબક્કાની કામગીરી 50 ટકા પૂર્ણ થઈ છે. આ પ્રોજેક્ટ પૂરો થતાં નાગરિકોને આશરે ૧૦૦ ઈ-બસોનો લાભ મળશે.
ગોત્રી વિસ્તારમાં ટીપી.૬૦ ખાતે ઈ-બસ ટર્મિનલ અને ચાર્જિંગ સ્ટેશનનું નિર્માણ ઝડપી ગતિએ ચાલી રહ્યું છે. આ પ્રોજેક્ટના પ્રથમ તબક્કાની ૫૦ ટકા કામગીરી પૂર્ણ થઈ ચૂકી છે અને બાકીની કામગીરી ૨૦૨૬ના પ્રારંભ સુધી પૂર્ણ કરવાની યોજના છે. પ્રથમ તબક્કાનો અંદાજિત ખર્ચ રૂ. ૧૦.૨૮ કરોડ છે. અહીં કુલ ૫૧ ઈ-બસની ક્ષમતા ધરાવતું ડેપો વિકસાવવામાં આવી રહ્યું છે, જેમાં ૨૭ બસ પાર્કિંગ અને ૨૪ ચાર્જિંગ પોઈન્ટ્સની સુવિધા રહેશે. આ ઉપરાંત વહીવટી કાર્યાલય, વર્કશોપ, વોશિંગ એરિયા અને લેન્ડસ્કેપિંગ જેવી જરૂરી સુવિધાઓ એક જ જગ્યાએ ઉપલબ્ધ થશે. બીજા તબક્કામાં રૂ. અંદાજિત ૧૨.૫૦ કરોડના ખર્ચે મુસાફરો માટે આધુનિક બસ ટર્મિનલ બનાવવામાં આવશે, જેમાં ૪૮ ચાર્જિંગ પોઈન્ટ્સ, ટુ-વ્હીલર અને ફોર-વ્હીલર પાર્કિંગ, આરામદાયક વેઈટિંગ એરિયા, ટિકિટ વિન્ડો અને રિક્રિએશન ઝોનનો સમાવેશ થશે. તદુપરાંત, સયાજીગંજ સીટી બસ સ્ટેન્ડ ખાતે પણ ૧૧ ઈ-ચાર્જિંગ સ્ટેશનોના નિર્માણનું ૫૦ ટકા કામ પૂર્ણ થઈ ગયું છે.
