મુંબઈ : છેલ્લા એક દાયકામાં ઉભરતા-વિકાસશીલ બજારો-માર્કેટ (ઈએમ)માં શ્રેષ્ઠ પ્રદર્શનનું નેતૃત્વ કરનારા ભારતીય શેર બજારોની વિકાસ ગતિ હવે એકંદર કોન્સોલિડેશનના તબક્કા સાથે ધીમી પડી રહી છે, જ્યારે ચાઈના અને તાઈવાન જેવા સાથી દેશો મજબૂત કમબેક-પુનરાગમન કરી રહ્યા છે.
વિશ્લેષકોએ જણાવ્યું છે કે, રાજકોષીય અને નાણાકીય સપોર્ટ વધતાં સ્થાનિક રોકાણકારોના આધાર અને મજબૂત વળતર સાથે બજારને નવી ગતિ માટે સ્થાન આપે છે. છેલ્લા ૧૨ મહિનામાં એમએસસીઆઈ ચીન ૩૫ ટકા વધ્યો છે, એમએસસીઆઈ ઈએમ ૨૬ ટકા વધ્યો છે. જ્યારે એમએસસીઆઈ ઈન્ડિયા ડોલરના સંદર્ભમાં લગભગ સ્થિર રહ્યો છે.
છેલ્લા પાંચ વર્ષમાં મજબૂત વળતર બાદ તાજેતરનું પ્રદર્શન નબળું આવ્યું છે. ઓકટોબર ૨૦૨૦ અને ઓકટોબર ૨૦૨૫ દરમિયાન સ્થાનિક ઈક્વિટી વાર્ષિક ધોરણે ૧૩.૭ ટકા વધ્યા, જ્યારે એમએસસીઆઈ ઈએમ માત્ર પાંચ ટકા વધવામાં સફળ રહ્યો હતો. આ દરમિયાન ઓકટોબર ૨૦૧૫ અને ઓકટોબર ૨૦૨૦ વચ્ચે એમએસસીઆઈ ઈએમ એ ૩.૬ ટકાની સામે ૫.૪ ટકાના વધારા સાથે ભારતને પાછળ છોડી દીધું છે.
એમએસસીઆઈ ઈન્ડિયા ઈન્ડેક્સમાં છેલ્લા દાયકામાં વાર્ષિક ધોરણે ૮.૬ ટકાનો વધારો થયો છે, જ્યારે એમએસસીઆઈ ઈએમ ઈન્ડેક્સમાં ૫.૯ ટકાનો વધારો થયો છે.
જીઓપોલિટીકલ અનિશ્ચિતતાઓ અને વૈશ્વિક જોખમ ટાળવાથી નજીકના ગાળામાં અસ્થિરતા વધી શકે છે. ભારતના વૈવિધ્યસભર કોર્પોરેટ લેન્ડસ્કેપ અને માળખાકીય વૃદ્વિના ચાલકો તેને ઈમર્જિંગ માર્કેટ પોર્ટફોલિયોમાં મુખ્ય ફાળવણી બનાવે છે.
બ્રોકિંગ હાઉસના મતે દાયકા લાંબી તેજીનું શ્રેય મજબૂત આર્થિક ફંડામેન્ટલ બાબતો, કોર્પોરેટ કમાણી અને સ્થાનિક રોકાણકારોની હિસ્સેદારીમાં વધારો છે. ૨૦૧૫થી ૨૦૨૫ દરમિયાન ભારતે ૬ ટકાની સરેરાશ જીડીપી વૃદ્વિ નોંધાવી છે જે ઈમર્જિંગ માર્કેટ એવરેજ ચાર ટકાથી વધુ છે અને ચાઈનાના ૪.૫ ટકાથી પણ સંતોષકારક આગળ છે.
રેકોર્ડ ઊંચાઈથી નીચે આવવા છતાં, ભારતીય ઈક્વિટી હજુ પણ વૈશ્વિક સમકક્ષોની તુલનામાં વેલ્યુએશન પ્રીમિયમ પર ટ્રેડ કરે છે. ઓકટોબર ૨૦૨૫ સુધીમાં, એમએસસીઆઈ ઈન્ડિયા ઈન્ડેક્સનું મૂલ્ય પાછલા અર્નિંગના ૨૫.૨ ગણા પર હતું. જે ઈમર્જિંગ માર્કેટની સરેરાશ ૧૬.૨ ગણા કરતા લગભગ ૫૫ ટકા વધારે છે, જો કે તેના લાંબાગાળાની સરેરાશ પ્રીમિયમ ૭૮ ટકાથી નીચે છે.
