વડોદરા,પાણીગેટ દરવાજા પાસે પ્રેમ પ્રકરણના કારણે પ્રેમિકાના પૂર્વ પતિની છરીના ઘા ઝીંકીને કરપીણ હત્યા કરનાર આરોપીને સાથે રાખી પોલીસેવીડિયોગ્રાફી સાથે ઘટનાનું એક કલાક રિકન્સટ્રક્શન કર્યું હતું. તપાસમાં એવી વિગતો જાણવા મળી છે કે, મરનારે ફોન કરીને આરોપીને ધમકી આપી હતી અને તું પાણીગેટ દરવાજા પાસે આવ. હું અહીંયા જ ઊભો છું. તેવું કહેતા આરોપી છરી લઇને પહોંચી ગયો હતો.
પોલીસ સૂત્રોના જણાવ્યા અનુસાર, આરોપી વિશાલ અને મરનાર મોહંમદહુસેન સૈયદની પૂર્વ પત્ની વચ્ચે છેલ્લા છ વર્ષથી પ્રેમસંબંધ હતો. વિશાલ સાથે લગ્ન કરવા માટે કારણે મોહંમદહુસેનની પત્નીએ છૂટાછેડા લઇ લીધા હતા. ત્યારબાદ તે અવારનવાર વિશાલને લગ્ન કરી લેવા માટે દબાણ કરતી હતી અને કહેતી હતી. વિશાલ તેને પૈસાની પણ મદદ કરતો હતો. પરંતુ,વિશાલ લગ્ન કરવા તૈયાર નહતો. જેના કારણે બંને વચ્ચે તકરાર પણ થતી હતી. વિશાલ અને મોહંમદહુસેન વચ્ચે અવારનવાર તકરાર પણ થતી હતી. મોહંમદહુસેન તેને ધમકી પણ આપતો હતો. બનાવના દિવસે મોહંમદહુસેને અન્ય એક નંબર પરથી વિશાલને કોલ કરી ધમકાવી કહ્યું કે, હું અહીંયા ઊભો છું. તું આવી જા. જેથી, ઉશ્કેરાયેલો વિશાલ કહાર છરી લઇને પાણીગેટ દરવાજા પાસે પહોંચી ગયો હતો. બંને વચ્ચે બોલાચાલી પછી ઉશ્કેરાયેલા વિશાલે છરીના ઉપરાછાપરી ઘા ઝીંકી મોહંમદહુસેનની હત્યા કરી હતી. પાણીગેટ પી.આઇ. એ.બી. પટેલે જણાવ્યું છે કે, વિશાલને જે નંબર પરથી કોલ આવ્યો હતો. તે નંબરની ડિટેલ મેળવવામાં આવી રહી છે. પોલીસની તપાસમાં એવી પણ વિગતો પ્રકાશમાં આવી છે કે, પ્રેમિકાના લગ્ન માટેના દબાણ અને લગ્નેતર સંબંધના કારણે પરિવારના ઝઘડાથી વિશાલ કંટાળી ગયો હતો.
મારા પતિને તેની પ્રેમિકા મરવાની ધમકી આપી બ્લેકમેલ કરે છે
વડોદરા,
વિશાલના મોબાઇલમાં એક ટાઇપ કરેલી અરજીનો ફોટો પણ મળી આવ્યો છે. જેમાં વિશાલની પત્ની કિરણે પોલીસ કમિશનરને ઉદ્દેશીને લખેલી એક ચિઠ્ઠી હતી. જેમાં લખ્યું હતું કે, મારા પતિને મોહંમદહુસેનની પૂર્વ પત્ની સાથે અફેર હતું. મારા પતિ પાસેથી પૈસા પડાવે છે. મારા પતિ તેની સાથે રહેવા તૈયાર નથી. મારા પતિ ના પાડે તો બ્લેકમેલ કરી મરવાની ધમકી આપે છે. તેણે ઘરે આવીને પંખા પર સાડી વડે ગળાફાંસો ખાવાની કોશિશ કરી હતી.
પ્રેમિકાના મોબાઇલમાં અન્ય વ્યક્તિ સાથેની ચેટ વિશાલ જોઇ ગયો
વડોદરા,
વિશાલ કહારે એક દિવસ તેની પ્રેમિકાના મોબાઇલમાં અન્ય વ્યક્તિ સાથેની ચેટ જોઇ ગયો હતો.જેના કારણે બંને વચ્ચે ઝઘડો થયો હતો. પોલીસે પ્રેમિકાને નિવેદન માટે બોલાવી છે.વિશાલ ફોટા મોકલતો હોઇ મોહંમદહુસેને તેને ધમકી આપી ફોટા નહીં મોકલવા કહ્યું હતું. આ મુદ્દે બંને વચ્ચે અવારનવાર ઝઘડા પણ થયા હતા.
ઘરે જઇને કપડા બદલી રિક્ષામાં સમા જતો રહ્યો હતો
વડોદરા,
હત્યા કર્યા પછી વિશાલ ઘરે ગયો હતો. તેણે સિલાઇ મશીન નીચે છરી સંતાડીને કપડા બદલીને ભાગી ગયો હતો. પાણીગેટથી તે રિક્ષામાં બેસીને સમા વિસ્તારમાં રહેતા સંબંધીના ઘરે જતો રહ્યો હતો અને ત્યાંથી તે વિશ્વામિત્રી નદીના કોતરમાં ભાગ્યો હતો. પરંતુ, પોલીસે તેની દબોચી લીધો હતો.
