વડોદરા, તા.5 વડોદરા ફાયર બ્રિગેડ દ્વારા કરવામાં આવેલી ૩.૧૭ કરોડની ખરીદીના કૌભાંડમાં સસ્પેન્ડ થયેલા ત્રણેય અધિકારીઓ સામે ખાતાકીય તપાસ કરવામાં આવશે. 
ખરીદી કૌભાંડમાં આરોગ્ય અમલદાર ડો. દેવેશ પટેલ, ચીફ ફાયર ઓફિસર મનોજ પાટીલ અને ડેપ્યુટિ ફાયર ઓફિસર નૈતિક ભટ્ટને સસ્પેન્ડ કરવામાં આવ્યા હતા.
અગાઉ આ કૌભાંડ બહાર આવતા તપાસ સમિતિનું ગઠન કરાયું હતું, અને તેના રિપોર્ટના આધારે ત્રણેયને ગઈકાલે સસ્પેન્ડ કરાયા હતા.
હવે મ્યુનિ. કમિશનરે અન્ય હુકમ ન થાય ત્યાં સુધી ચીફ ફાયર ઓફિસરનો હવાલો ડિવિઝનલ ઓફિસર (ફાયર) હરેન્દ્રસિંહ ચૌહાણને આપ્યો છે. આરોગ્ય અમલદારનો હવાલો અધિક આરોગ્ય અમલદાર ડો.મુકેશ વૈદ્યને સોંપ્યો છે. આઈસીડીએસ વિભાગ સિવાયના તમામ ખાતાઓનો ચાર્જ તેમણે હાલની કામગીરી ઉપરાંત સંભાળવાનો રહેશે. આઈસીડીએસનો ચાર્જ હાલના હ. પ્રોગ્રામ ઓફિસર અંબિકાબેન જયસ્વાલે હાલની કામગીરી ઉપરાંત સંભાળવાનો રહેશે. ડેપ્યુટિ ચીફ ફાયર ઓફિસરનો હવાલો સ્ટેશન ઓફિસર (ફાયર) અમિત ચૌધરીને સોંપાયો છે.
