માર્કેટીંગ યાર્ડ પાસે હુડકો ક્વાર્ટરની ઘટના
સ્થાનિકોને ખબર પડતાં તાળા તુટેલા મકાન પાસે ગયા : જાણ થતા ત્રણેય ભાગ્યા પરંતુ એક પકડાઇ ગયો
રાજકોટ: જૂના માર્કેટીંગ યાર્ડની દિવાલવાળી શેરીમાં હુડકો ક્વાર્ટરમાં એલ-૧માં રહેતા મનજીતસિંગ સ્વર્ણસિંગ સબરવાલ (ઉ.વ.૬૭)ના બંધ મકાનમાં ગઇકાલે રાત્રે ત્રણ શખ્સો તાળા તોડી ચોરીના ઇરાદે ઘુસ્યા હતા. જો કે સ્થાનિક લોકોને જાણ થઇ જતાં એક તસ્કરને પકડી લઇ પોલીસને સોંપ્યો હતો. જ્યારે બે ભાગી ગયા હતાં.
બી ડીવીઝન પોલીસે આ મામલે હિતેશભાઈ મકવાણા (ઉ.વ.૩૭, રહે. હુડકો ક્વાર્ટર ઇ-૧)ની ફરિયાદ પરથી પ્રતાપ અજીત ધાંધલ, લખન બચુ માલાણી અને પ્રિન્સ અશોક પરમાર (રહે. બધા ચુનારાવાડ)ની સામે ગુનો દાખલ કર્યો હતો. હિતેશભાઈએ પોલીસને જણાવ્યું કે તેની ઘરની એક શેરી આગળ હુડકો ક્વાર્ટરની દિવાલવાળી શેરીમાં મિત્ર ધર્મેશભાઈનું ડેકોરેશનનું ગોડાઉન આવેલ છે. જેની બાજુમાં મનજીતસિંગ સબરવાલ રહે છે. જે હાલ મકાન બંધ કરી મુંબઇ ગયા છે.
ગઇકાલે રાત્રે તે ઘરેથી તેજ વિસ્તારમાં પાનની દુકાને ફાકી ખાવા ગયા હતા. પરત ફરતી વખતે મનજીતસિંગના મકાનમાંથી કંઇક તોડવાનો અવાજ આવતા તસ્કરો ઘુસ્યા હોવાનું જાણવા મળતા મિત્ર ધર્મેશભાઇ અને અન્ય સ્થાનિકોને ત્યાં બોલાવી લીધા હતાં. જ્યાં જઇને ધર્મેશભાઈએ અંદર જવાનો પ્રયાસ કરતાં ઘરમાંથી ત્રણ શખ્સોએ ભાગવાનો પ્રયાસ કર્યો હતો. જે પૈકી એક પ્રતાપ ધાધલ પકડાઇ જતા તેની પૂછપરછ કરતાં તેની સાથેના બે શખ્સો લખન અને પ્રિન્સ હોવાનું જણાવતા પોલીસને બોલાવી પ્રતાપને સોંપી દેતા વધુ તપાસ હાથ ધરાઇ છે.
