– 9 વર્ષ પૂર્વેના બનાવમાં બોટાદ કોર્ટનો ચૂકાદો
– અળવના શખ્સે લૂંટ અંગેની ફરિયાદની દાઝ રાખી વાહન ચડાવી દઈ બન્ને ભાઈઓને મારી નાખવાનો પ્રયાસ કર્યો હતો
બોટાદ : બોટાદમાં નવ વર્ષ પૂર્વે વકીલ બંધુઓ પર બોલેરો વાહન ચડાવી મારી નાખવાની કોશિશના કેસમાં ડીસ્ટ્રીકટ એન્ડ સેશન્સ કોર્ટએ આરોપીને ત્રણ વર્ષની કેદની સજા ફટકારી છે
બોટાદ ન્યાય કોર્ટમાં પ્રેક્ટીસ કરતા વકીલ બંધુઓ રાજેશભાઈ રસિકભાઈ બગડિયા તથા દિલીપભાઈ રસિકભાઈ બગડિયા ગત તા.૧૪ સપ્ટેમ્બર ૨૦૧૬ ના રોજ સવારના દસ વાગ્યે પોતાની ઓફિસે જવા નીકળ્યા હતા તે દરમિયાન બોટાદ રેલ્વે સ્ટેશન રોડ પર આવેલ સહકારનગરના ખૂણા પાસે આરોપી માધુ જીલુભાઈ ખાચર (રહે.અળવ ) એ અગાઉની એક લૂંટ અંગેની ફરિયાદની દાઝ રાખી બોલેરો પીક-અપ વાહન એકદમ પુરપાટ ઝડપે ચલાવી બન્ને વકીલ ભાઈઓને મારી નાખવાના ઈરાદે ઈરાદાપૂર્વક અથડાવી અને ખૂન કરવાની કોશિશ કરી હતી.આ અંગેની ફરિયાદ વકીલ રાજેશભાઈ બગડિયાએ બોટાદ પોલીસ સ્ટેશનમાં નોંધાવી હતી. બોટાદ પોલીસે ઈ.પી.કો કલમ ૩૦૭ મુજબનો ગુન્હો નોંધી માધુ જીલુભાઈ ખાચરની ધરપકડ કરી હતી.આ બનાવ અંગેનો કેસ બોટાદની ડીસ્ટ્રીકટ એન્ડ સેશન્સ કોર્ટમાં ચાલી જતા સરકારી વકીલ કે.એમ.મકવાણાની અસરકારક દલીલો તથા રજુઆતો ગ્રાહ્ય રાખી ડીસ્ટ્રીકટ એન્ડ સેશન્સ જજ એમ.જે.પરાસર એ આરોપી માધુ જીલુભાઈ ખાચરને આઇપીસી કલમ ૩૨૪ ના ગુનામાં કસુરવાન ઠરાવી ત્રણ વર્ષની કેદની સજા અને દંડ ભરવાનો હુકમ ફરમાવેલ છે.
