બોટાદ ટાઉન પોલીસ મથકનો ટોળાએ ઘેરાવ કર્યો
પીધેલા શખ્સ વિરૂધ્ધ કાર્યવાહી કરતા ટોળાએ પોલીસ વાન પર પથ્થર મારો કર્યો
ભાવનગર: બોટાદમાં પોલીસે નશીલી હાલતમાં શખ્સને ઝડપી પાડયો હતો. આ શખ્સને છોડાવવા મહિલા સહિત બાર જેટલા લોકોના ટોળાએ પોલીસ વાન પર પથ્થરમારો કરી પોલીસ કોન્સ્ટેબલને ઢીંકા પતિનો માર મારી ફરજમાં રૂકાવટ કરી પોલીસ મથકનો ઘેરાવ કર્યો હતો.
બોટાદ ટાઉન પોલીસ મથકના પોલીસ કોન્સ્ટેબલ પંકજભાઈ સામતભાઈ પડયા તથા પો.કોન્સ ચિરાગભાઈ પોપટભાઈ પંડયા બોટાદ ટાઉન પોલીસ સ્ટેશનના વિસ્તારમાં પેટ્રોલીંગમા હતા, તે દરમ્યાન રાજેશ ઉર્ફે પપ્પુ પરશોતમભાઈ હેડંબા પોતાના હાથમા લાકડી લઈ કેફી પીણંુ પીધેલ હાલતમાં મળી આવતા જેના વિરૂધ્ધ કાયદેસરની કાર્યવાહી કરવા સારૂ રાજેશ ઉર્ફે પપ્પુને પોલીસ સ્ટેશન ખાતે લઈ જતા રાજેશ ઉર્ફે પપ્પુના પત્ની જ્યોતિબેન હેડંબા તથા તેના પુત્ર મીત અને જતીન તથા સુરેશ કાંતીભાઈ મકવાણા તથા અનિલ ઉર્ફે હોલી મેઘજીભાઈ હેડંબા તથા મેઘાજી ગીગાભાઈ હેડંબા તથા લાભુબેન મેઘજીભાઈ હેડંબા તથા સોનલબેન અશોકભાઇ ચાચિયા તથા કમલેશ રમેશભાઇ રાઠોડ તથા દિનેશ નારાયણભાઇને બોલાવી ગેરકાયદે મંડળી રચી એકસંપ કરી સમાન ઉદ્દેશ્ય પાર પાડવા જ્યોતિબેને પીસીઆર વાન-૨ના ઈન્ચાર્જ આ.પો.કો. જયેશભાઈ મનજીભાઈ ચૌહાણનો વર્ધીનો પોલીસ પટ્ટો પકડી ઢીંકાપાટુનો માર મારી છરીનો ઘા ઝીંકી ધમકી આપી હતી. તદુપરાંત પોલીસ તથા પી.સી.આર વાન-ર ઉપર પથ્થરમારો કરી પી.સી.આર વાન-૨ને તોડી નુકસાન કર્યું હતું. પોલીસ સ્ટેશન ખાતેથી બહાર જઈ બહારથી મહિલા તથા પુરૂષને બોલાવી પોલીસ સ્ટેશનનો ઘેરાવો કરી પોલીસ વિરૂધ્ધ સુત્રોચાર કરી પોલીસ હાય હાયના નારા લગાવી જેમ ફાવે તેમ ગાળો બોલી જાનથી મારી નાખવાની ધમકી આપી હતી. આ બનાવ સંદર્ભે પોલીસ કોન્સ્ટેબલ પંકજભાઈ સામતભાઈ પડયાએ મહિલા સહિત ૧૨ લોકો વિરૂધ્ધ બોટાદ ટાઉન પોલીસ મથકમાં ફરિયાદ નોંધાવતા પોલીસે વધુ તપાસ હાથ ધરી છે.
પોલીસને પટ્ટા-ટોપી ઉતારી દેવાની મહિલાની ધમકી
સ્થળ પર થયેલી ધમાલ બાદ આરોપીને પી.સી.આર વાન-૨માં બેસાડી રવાના થઈ બોટાદ ટાઉન પોલીસ સ્ટેશન ખાતે લાવતા હરિયાળી જ્યોતિબેનએ પોલીસ સ્ટેશનમાં આવી ગાળો આપી અને કહેવા લાગેલ કે, ‘તમો હવે અહિ કેમ નોકરી કરો છો તે હું જોવ છું’ તેમ કહિ પટ્ટા-ટોપી ઉતારી દેવાની ધમકી આપી હતી.
