વડોદરાઃ ધો.૧૦ અને ધો.૧૨ની ગુજરાત બોર્ડ પરીક્ષા શરુનું કાઉન્ટ ડાઉન શરુ થઈ ગયું છે તો બીજી તરફ આ પરીક્ષા માટે વિદ્યાર્થીઓનું કાઉન્સિલિંગ કરવા માટેની હેલ્પલાઈન પર પણ વિદ્યાર્થીઓ પોતાની મૂંઝવણો રજૂ કરી રહ્યા છે.
હેલ્પલાઈનમાં નવ આચાર્યો અને બે કાઉન્સિલરોનો સમાવેશ કરવામાં આવ્યો છે.જેઓ દર વર્ષની જેમ આ વર્ષે પણ વિદ્યાર્થીઓને જરુર પડે તો માર્ગદર્શન આપી રહ્યા છે.હેલ્પલાઈનની ટીમમાં સામેલ આચાર્ય પરેશભાઈ શાહનું કહેવું છે કે, દર વર્ષની જેમ આ વર્ષે પણ વિદ્યાર્થીઓના સૌથી વધારે સવાલ એ છે કે, પરીક્ષા ખંડમાં હું ભૂલી જઈશ તો? તેની સાથે સાથે જે પ્રશ્નો સૌથી વધારે વિદ્યાર્થીઓ પૂછી રહ્યા છે તેમાં મિત્રોનો સિલેબસ પૂરો થઈ ગયો છે અને મારો સિલેબસ બાકી છે, જેના કારણે મને ટેન્શન થઈ રહ્યું છે તેનો પણ સમાવેશ થાય છે.
છેલ્લી ઘડીએ નવો ટોપિક વાંચવો કે જૂના ટોપિકનું રિવિઝન કરવું તેવું પણ વિદ્યાર્થીઓ પૂછી રહ્યા છે.કેટલાક વિદ્યાર્થીઓ અક્ષર ખરાબ હોય તો બોર્ડ પરીક્ષામાં માર્કસ કપાય છે? રાત્રે મોડે સુધી વાંચવું સારુ કે વહેલા ઉઠીને?બોર્ડનું પેપર અઘરુ આવ્યું તો શું થશે? વાંચતી વખતે કંટાળો આવે છે તો શું કરવું?ધાર્યા કરતા વધારે માર્કસ નહીં આવે તો ? ..જેવા સવાલો પણ પૂછતા હોય છે.જેના અમે બને તેટલા સંતોષકારક જવાબો આપીને વિદ્યાર્થીઓને ધરપત રાખવા અને શાંતિથી પરીક્ષા આપવા સમજાવીએ છે.
વિદ્યાર્થીઓને હેલ્પલાઈન પર શું સમજાવવામાં આવે છે
પેપર હાથમાં આવે એટલે બે મિનિટ આંખો બંધ કરીને ઉંડો શ્વાસ લો
–મગજ કશું ભુલતું નથી.ગભરામણના કારણે યાદ કરવામાં તકલીફ પડતી હોય છે.પેપર હાથમાં આવે એટલે બે મિનિટ આંખો બંધ કરીને ઉંડા શ્વાસ લો અને જે સવાલનો જવાબ સૌથી સારો આવડતો હોય ત્યાંથી લખવાનું શરુ કરો.ધીમે ધીમે બધું યાદ આવશે
–પરીક્ષાના દિવસોમાં રિવિઝન પર જ ધ્યાન આપો.નવો ટોપિક વાંચવાથી મૂંઝવણ વધશે અને આત્મવિશ્વાસ ઘટશે.
–દરેક વિદ્યાર્થીની વાંચવાની અને યાદ રાખવાની ક્ષમતા અલગ હોય છે એટલે કોઈની સાથે સરખામણી કર્યા પગર તમારા ટાઈમ ટેબલ પર અને લક્ષ્ય પર ધ્યાન કેન્દ્રીત કરો.
–મોબાઈલ બીજા રુમમાં મૂકીને વાંચો અથવા મમ્મી- પપ્પાને આપી દો
–બોર્ડની પરીક્ષામાં મોતીના દાણા જેવા અક્ષરો હોવા જરુરી નથી.માત્ર તમારા અક્ષર ઉકલે તેવા હોવા જોઈએ.બે શબ્દો અને બે લાઈન વચ્ચે યોગ્ય જગ્યા રાખો અને બને તો ચેકચાક ટાળો
–રાત્રે શાંતિથી વાંચવાનું ગમતું હોય તો તેમ કરો અને સવારે વહેલા ઉઠીને યાદ રહેતું હોય તો સવારે વાંચો.બસ સાત થી આઠ કલાકની ઊંઘ પૂરી થવી જોઈએ.
–બોર્ડ પેપર ચોક્કસ બ્લુ પ્રિન્ટ પ્રમાણે સેટ થાય છે.જેમાં સરળ, મધ્યમ અને અઘરા પ્રશ્નોનું સંતુલન હોય છે.પેપર ખરેખર અઘરુ હશે તો બધા જ વિદ્યાર્થીઓ માટે અઘરુ હશે.
–વાંચતી વખતે દર ૪૦ થી ૫૦ મિનિટ પછી ૧૦ મિનિટનો બ્રેક લઈ શકાય.
વાલીઓ- વિદ્યાર્થીઓમાં જાગૃતિ વધી છે
હેલ્પલાઈન ટીમના સભ્ય અને આચાર્ય ભરતભાઈ પરમારનું કહેવું છે કે, પરીક્ષાને લઈને વિદ્યાર્થીઓ અને વાલીઓમાં જાગૃતિ વધી છે.જેના કારણે ગત વર્ષ કરતા આ વર્ષે હેલ્પલાઈન પર માર્ગદર્શન માટેના ફોન ઓછા આવ્યા છે.જેટલા પણ વિદ્યાર્થીઓ ફોન કરે છે તેમાં સૌથી વધારે પૂછાતો સવાલ તો વાંચેલું યાદ નથી રહેતું અને જે યાદ છે તે ભૂલી તો નહીં જઉંને? તે જ હોય છે.
પરીક્ષામાં સ્પેલિંગ ખોટા લખાશે તેની ચિંતા
હેલ્પલાઈન ટીમના સભ્ય અને કાઉન્સિલર પૂર્વી ભીમાણીના જણાવ્યા પ્રમાણે ટેકનોલોજી પર વધી રહેલી નિર્ભરતાની અસર અભ્યાસ પર દેખાઈ રહી છે.મોબાઈલ પર ટાઈપ કરતી વખતે ઓટો સ્પેલ ચેક હોવાથી વિદ્યાર્થીઓને સ્પેલિંગ યાદ રાખવાની ઝંઝટ ન થી રહેતી.હવે વિદ્યાર્થીઓને પરીક્ષામાં સ્પેલિંગ ખોટા લખાશે તેવી ચિંતા સતાવી રહી છે.આ બાબતે વિદ્યાર્થીઓ માર્ગદર્શન માંગી રહ્યા છે.એઆઈ પર પણ વિદ્યાર્થીઓ વધારે આધાર રાખતા થયા હોવાથી તેની અસર પરીક્ષાની તૈયારી પર પડી રહી છે.
