જેતપુરના ખીરસરામાં પરાણે ગબડાવાતું શિક્ષણનું ગાડું : ગ્રામ પંચાયત સંચાલિત 65 વર્ષ જૂની નવચેતન હાઈસ્કૂલ ખડેર બની જતાં વિકટ સ્થિતિ : બધી સુવિધા છે, પણ શાળા બિલ્ડિંગની વ્યવસ્થા જ નથી
જેતપુર, : જેતપુર તાલુકાના ખીરસરા ગામે ગ્રામ પંચાયત સંચાલિત નવચેતન હાઇસ્કુલની ઇમારત અતિ જર્જરીત અવસ્થામાં છે અને છેલ્લા 25 વર્ષથી 90 ટકાથી વધુ પરીણામ લાવતી હોવા છતાં વિદ્યાર્થીઓ સહકારી મંડળીના ગોડાઉનમાં ભણવાની મજબુરી વેઠી રહ્યા છે. જ્યાં શિક્ષકો અને સાધન-સામગ્રીની સુવિધા ઉપલબ્ધ કરાવાઈ છે, પણ શૌચાલયની વ્યવસ્થા નથી.
‘ભણે ગુજરાત’, ‘ભાર વગરનું ભણતર’, ‘સ્માર્ટ કલાસ’ આવું બધું સરકારી જાહેરાતમાં સારૂ લાગે, વાસ્તવિક રીતે જોવા જઈએ તો વિદ્યાર્થીઓ જર્જરીત ઇમારતોમાં અથવા તો શાળાની ઇમારતના ઠેકાણા ન હોય તો ખુલ્લામાં ભણતા હોય છે. આવી જ એક હાઈસ્કૂલની જેતપુર તાલુકાના ખીરસરા ગામે છે. ખીરસરા ગ્રામ પંચાયત સંચાલિત નવચેતન હાઈસ્કૂલમાં વિદ્યાર્થીઓની પૂરતી સંખ્યા છે, કોમ્પ્યુટર છે, પ્રોજેક્ટર છે, લેબના સાધનો છે, સ્માર્ટ ટીવી સ્ક્રીન છે, સ્ટાફ પણ પૂરતો છે તો હવે ઘટે શું તે પ્રશ્ન થતો હશે તો ઘટે હાઈસ્કૂલની ઇમારત !
ખીરસરા ગામમાં ઇ.સ. 1961માં ગ્રામ પંચાયત સંચાલિત નવચેતન હાઈસ્કૂલની સ્થાપના કરવામાં આવી હતી. એટલે કે 65 વર્ષ જેટલો સમય થઈ જતા ઇમારત હાલ અતિ જર્જરીત અને ગમે ત્યારે ધરાશાયી થઈ જાય તેવી થઈ ગઈ છે. ચોમાસામાં ક્લાસમાં પાણી પણ પડતું હોવાથી દોઢ વર્ષ પૂર્વે વિદ્યાર્થીઓનું ભણતર ન બગડે તે માટે હાઈસ્કૂલ સ્ટાફ દ્વારા વૈકલ્પિક વ્યવસ્થારૂપે ગ્રામ પંચાયત પાસે ઇમારત માંગી હતી. ગ્રામ પંચાયત પાસે મોટી જગ્યા ન હોવાથી ગ્રામ પંચાયત કચેરીનો એક રૂમ અને સહકારી મંડળીનું ગોડાઉન કલાસરૂમ માટે ફાળવવામાં આવ્યું હતું. જેમાં અભ્યાસ તો શરૂ થયો, પરંતુ વિદ્યાર્થિનીઓ પણ અભ્યાસ કરતી હોવા છતાં શૌચાલયની સુવિધા નથી.
શિક્ષકોએ ફાળો એકત્ર કરીને અંગ્રેજી વિષયનાં શિક્ષક રાખ્યા
ખીરસરાની નવચેતન હાઈસ્કૂલનાં શિક્ષકો સુપેરે પોતાની જવાબદારી નિભાવે છે. વિદ્યાર્થીઓનું હિત ઇચ્છતા શિક્ષકો હોવાને કારણે તેઓ જ અંગ્રેજી વિષયના ઘટતા શિક્ષક માટે દર મહિને ફાળો એકત્રિત કરી અંગ્રેજી વિષયના શિક્ષકને પગાર ચૂકવી ઘટ પૂર્ણ કરી છે અને પરીણામ ગત વર્ષ 94 ટકા લાવ્યા હતા.
