વડોદરા, તા.15 મુંબઇ-અમદાવાદ ભારતમાલા એક્સપ્રેસ વે પર આજે વહેલી સવારે વડોદરા નજીક એક કારની ટક્કરે રોડ ક્રોસ કરતા નર દીપડાનું મોત નિપજ્યું હતું.
પ્રાપ્ત માહિતી મુજબ રાજકોટના રહીશ દર્શનભાઇ સુરતમાં લગ્ન પ્રસંગમાં ગયા હતા અને ત્યાં હાજરી આપી પરિવારના સભ્યો સાથે પરત રાજકોટ જતા હતાં. તેઓ ભારતમાલા એક્સપ્રેસ હાઇવે પરથી કાર હંકારતા હતા અને વડોદરા નજીક પાદરા તાલુકાના સાદડ ગામ પાસેથી પસાર થતી વખતે સવારે પાંચ વાગે રોડ ઓળંગતા એક દીપડાને કારની ટક્કર વાગતા તેને ગંભીર ઇજા થતાં તે રોડ પર ફંગોળાયો હતો.
દર્શનભાઇએ તુરંત જ વન વિભાગને જાણ કરતા વન વિભાગનો સ્ટાફ સ્થળ પર આવી ગયો હતો પરંતુ દીપડાનું સ્થળ પર મૃત્યુ થયું હોવાથી દીપડાને પીએમ માટે ખસેડયો હતો. શિડયૂલ-૧માં દીપડો પ્રાણી આવતું હોવાથી તેનું પીએમ કરાવવું જરૃરી હોવાથી આ પ્રક્રિયા હાથ ધરવી પડી હતી. વન વિભાગના જણાવ્યા મુજબ કાર અકસ્માતમાં મૃત પામેલ નર દીપડો ૧૨થી ૧૩ વર્ષની વયનો હતો. દીપડાની સાથે અકસ્માતના પગલે એરબેગ ખૂલી જતા અંદર બેસેલ ચારેય વ્યક્તિનો બચાવ થયો હતો.
ઉલ્લેખનીય છે કે વડોદરાની આસપાસના વિસ્તારોમાં દીપડા સહિતના અનેક પ્રાણીઓનો વસવાટ છે તેઓ ખોરાકની શોધમાં એક સ્થળેથી અન્ય સ્થળે જતા હોય છે.
