– બગદાણા પોલીસ મથકમાં એનડીપીએસની કલમો હેઠળ ગુનો નોંધાયો
– બગદાણા પોલીસે 1.034 કિલોગ્રામ ગાંજાના છોડ સાથે વૃદ્ધને રૂ. 51,700 ના મુદ્દામાલ સાથે ઝડપી લીધો
ભાવનગર : મહુવાના છાપરી ગામે કપાસના વાવેતર વચ્ચે ઉગાડેલા ગાંજાના ૫૦ છોડ સાથે વૃદ્ધને બગદાણા પોલીસે કુલ રૂ.૫૧,૭૦૦ના મુદ્દામાલ સાથે ઝડપી લઈ બગદાણા પોલીસ મથકમાં એનડીપીએસ એક્ટની કલમો હેઠળ ગુનો નોંધી આગળની કાર્યવાહી હાથ ધરી છે.
મહુવા તાલુકાના છાપરી ગામે સડતર વાડી વિસ્તારમાં રહેતા કનુભાઈ અરજણભાઈ ગોહિલ પોતાની વાડીએ કપાસના વાવેતરની વચ્ચે ગાંજાના છોડનું વાવેતર કરેલું હોવાની બાતમીના આધારે બગદાણા પોલીસે રેઈડ કરી તપાસ કરતા વાડીમાં કપાસના વાવેતર વચ્ચે અલગ-અલગ ચાસમાં વાવેલા ગાંજાના કુલ ૫૦ છોડ મળી આવ્યા હતા. જેનું એફએસએલ અધિકારીને બોલાવી સ્થળ પર પરિક્ષણ કરી વાડીમાં હાજર કનુ અરજણભાઈ ગોહિલને ગાંજાના છોડ અંગે પુછપરછ કરતા જાબુંડા કટિંગ ખાતે આવેલા આશ્રમમાં સાધુ સંતો આવતા હોય જેમની સેવા પુજા માટે પોતાની વાડીમાં આજથી દોઢ માસ પૂર્વે ગાંજાના ૫૦ છોડ વાવ્યા હોવાની કબૂલાત આપતા બગદાણા પોલીસે રૂ.૫૧,૭૦૦ની કિંમતના ૧.૦૩૪ કિલોગ્રામ વજનના ગાંજાના કુલ ૫૦ છોડ કબ્જે લઈ બગદાણા પોલીસ મથકમાં વૃદ્ધ સામે એનડીપીએસ એક્ટની કલમો હેઠળ ગુનો નોંધી આગળની કાર્યવાહી હાથ ધરી છે.
કપાસના વાવેતર વચ્ચે ગાંજાનું વાવેતર મળવાનો સપ્તાહમાં બીજો બનાવ બન્યો
જિલ્લામાં કપાસના વાવેતર વચ્ચે ગાંજાના વાવેતર મળી આવવાનો આ સપ્તાબમાં બીજો બનાવ સામે આવ્યો છે. ગત તા.૧૨ના રોજ મહુવાના દયાળ ગામે વિરકુ ચિથરભાઈ બાટીયા (રહે.દયાળ)એ પોતાના પીવા માટે વાડીમાં કપાસના વાવેતરની આડમાં ઉગાડેલા ગાંજાના કુલ ૨૨ નંગ છોડ દાઠા પોલીસે ઝડપી લઈ એનડીપીએસની કલમ હેઠળ ગુનો નોંધી કાર્યવાહી હાથ ધરી હતી.
