મુંબઈ : વર્તમાન નાણાં વર્ષના એપ્રિલથી નવેમ્બરના પ્રથમ આઠ મહિનામાં દેશની ઈલેકટ્રોનિકસ માલસામાનની નિકાસ વાર્ષિક ધોરણે ૩૮ ટકા વધી ૩૧ અબજ ડોલર રહી છે. ઈલેકટ્રોનિકસ નિકાસમાં સ્માર્ટફોનનો હિસ્સો ૬૦ ટકા જેટલો રહ્યો હોવાનું વાણિજ્ય મંત્રાલયના ડેટા જણાવે છે.
દેશમાંથી નિકાસની ટોચની ૩૦ મુખ્ય ચીજવસ્તુઓમાં ઈલેકટ્રોનિકસની નિકાસ સૌથી ઝડપથી વધી રહી છે.
વર્તમાન નાણાં વર્ષના પ્રથમ આઠ મહિનામાં દેશની એકંદર નિકાસમાં ૭૯.૭૦ અબજ ડોલર સાથે એન્જિનિયરિંગ માલસામાનનો ક્રમ પહેલો રહ્યો છે જ્યારે ૩૭.૯૦ અબજ ડોલર સાથે બીજા ક્રમે પેટ્રોલિયમ પ્રોડકટસ તથા ૩૧ અબજ ડોલર સાથે ત્રીજા ક્રમે ઈલેકટ્રોનિકસ માલસામાન રહ્યો છે.
નાણાં વર્ષ ૨૦૨૫ના પ્રથમ આઠ મહિનામાં પેટ્રોલિયમ પ્રોડકટસની નિકાસનો આંક ૪૪.૫૮ અબજ ડોલર રહ્યો હતો જ્યારે ઈલેકટ્રોનિકસ માલસામાનનો આંક ૨૨.૫૦ અબજ ડોલર રહ્યો હતો. વર્તમાન નાણાં વર્ષના સમાન ગાળામાં પેટ્રોલિયમ પ્રોડકટસની નિકાસમાં ૧૪.૭૦ ટકા ઘટાડો થયો છે જ્યારે ઈલેકટ્રોનિકસ માલસામાનની નિકાસનું મૂલ્ય ૪૦ ટકા વધ્યું છે.
આમ પેટ્રોલિયમ પ્રોડકટસ તથા ઈલેકટ્રોનિકસની નિકાસ મૂલ્ય વચ્ચેના અંતરમાં નોંધપાત્ર ઘટાડો થઈ રહ્યો છે.
નાણાં વર્ષ ૨૦૨૮ સુધીમાં ઈલેકટ્રોનિકસની નિકાસ પેટ્રોલિયમ પ્રોડકટસ કરતા આગળ નીકળી જવાની શકયતા જોવાઈ રહી હોવાનું વાણિજ્ય મંત્રાલયના સુત્રોએ જણાવ્યું હતું.
વર્તમાન વર્ષના નવેમ્બરમાં ઈલેકટ્રોનિકસ નિકાસ ૩૯ ટકા વધી ૪.૮૧ અબજ ડોલર રહી હતી. વર્તમાન નાણાં વર્ષના પ્રથમ આઠ મહિનામાં દેશની ટોચની ૩૦ નિકાસ આઈટેમ્સમાંથી ૧૭ની નિકાસમાં વધારો થયો છે જ્યારે ૧૩માં ઘટાડો નોંધાયો છે.
