રાજકોટની પ્રતિષ્ઠિત સ્કૂલમાં અભ્યાસ કરતી 13 વર્ષની છાત્રાની પજવણી : હવે તું મોટી થઇ ગઇ છો, કાલે સવારે તારા લગ્ન થશે એટલે તને બધી જાણકારી હોવી જોઇએ : ગાંધીગ્રામ-2 પોલીસે પોક્સો સહિતની કલમો હેઠળ ગુનો નોંધી પરિણીત આરોપીની ધરપકડ કરી
રાજકોટ, : શહેરની એક પ્રતિષ્ઠિત સ્કૂલમાં અભ્યાસ કરતી 13 વર્ષની છાત્રાની આરોપી વિજય પરમારે છેડતી કર્યાનો ચોંકાવનારો કિસ્સો બહાર આવ્યો છે. ભોગ બનનાર છાત્રાએ સ્કૂલ ટીચરને આપવિતી જણાવી હતી. જેના આધારે તેના વાલીઓને જાણ થતાં આખરે ગાંધીગ્રામ-2 પોલીસ મથકમાં ફરિયાદ નોંધાવી હતી. પોલીસે પોક્સો સહિતની કલમો હેઠળ ગુનો નોંધી આરોપીની અટકાયત કરી હતી.
ભોગ બનનાર છાત્રાના પિતાએ પોલીસને જણાવ્યું કે ગઇ તા. 18ના રોજ રાત્રે તેની મોટી પુત્રીએ કોલ કરી જણાવ્યું કે તેની બહેનના સ્કૂલના ટીચરે તેને કોલ કરી કહ્યું છે કે તેની બહેનને કોઇ અંકલ હેરાન-પરેશાન કરે છે. જેથી પુત્રીની પુછપરછ કરતાં કહ્યું કે આરોપી છેલ્લા બે મહિનાથી એકાંત જોઇ તેની સાથે વાતચીત કરવાની કોશિષ કરે છે.
એટલું જ નહીં તેનો પીછો પણ કરે છે. તેને ન ગમતી વાતો કરે છે. તેણે હેરાન કરવાની ના પાડી છતાં માનતો નથી. જ્યારે પણ એકલી જોવે ત્યારે તેની પાસે આવી કહે છે કે તું હવે બહુ મોટી થઇ ગઇ છો, કાલે સવારે તારા લગ્ન થશે તો તને બધી જાણકારી હોવી જોઇએ. આટલું કહી તેની સાથે ખરાબ ભાષામાં વાતચીત કરી ફ્રેન્ડશીપ કરવાનું કહે છે.
તે જ્યારે પણ આરોપીને હેરાન નહીં કરવાનું કહે ત્યારે ઉશ્કેરાઇ જઇ ખરાબ વર્તન કરે છે. જેને કારણે ગભરાઇ જતાં અત્યાર સુધી કોઇને વાત કરી ન હતી. આખરે સ્કૂલ ટીચરને વાત કરી હતી. પુત્રીની આપવિતી સાંભળ્યા બાદ આજે ગાંધીગ્રામ-2 પોલીસ મથકનો સંપર્ક કરી ફરિયાદ નોંધાવી હતી. જેના આધારે પોલીસે આરોપીની અટકાયત કરી હતી. પોલીસે જણાવ્યું કે આરોપી પરિણીત છે.
