કારમાં આવેલા આઠેક શખ્સો સામે ગુનો નોંધાયો
ગડદાપાટુનો બેફામ માર મારી, ધોકા વડે તૂટી પડયાઃ લાશને ગીરમાં ફેંકી દેવાની ધમકી
રાજકોટ: મોટાભાઇએ કરેલા પ્રેમલગ્નનો ખાર રાખી ભરત કરમણભાઇ ભરવાડ (ઉ.વ.૨૨, રહે. કોઠારીયા સોલવન્ટ)નું આઠેક શખ્સો કારમાં અપહરણ કરી ગયા હતા. તેને બેફામ મારકુટ કરી, ધાકધમકી આપી છોડી દીધો હતો. આજી ડેમ પોલીસે ગુનો દાખલ કરી તપાસ હાથ ધરી છે.
ફરિયાદમાં ભરતે જણાવ્યું છે કે, ઘર નજીક મોબાઇલની દુકાન ધરાવે છે. ચાર ભાઇ અને એક બહેન છે. નાનાભાઇ વિજયે આઠેક માસ પહેલા રામભાઇ ટોળીયાની પુત્રી પાયલ સાથે પ્રેમલગ્ન કર્યા હતા.
ગઇકાલે રાત્રે તે તેની દુકાન વધાવી ફઇ અનુબેનના ઘરે ગયો હતો. જ્યાં જમવા બેઠો હતો ત્યારે ફઇના પુત્ર ગોપાલે આવી અમુક લોકો બહાર બોલાવતા હોવાનું કહ્યું હતું. જેથી તે બહાર નીકળતા ચાર શખ્સો તેની ઉપર તુટી પડયા હતા. તેમણે કહ્યું કે, તું જ વિજયનો ભાઇ છેને. બાદમાં તેને ગડદાપાટુ માર્યા હતા. તેવામાં ધીરુ ટોળીયા, રામભાઇ ટોળીયા, રાહુલ ટોળીયા અને ખોડાભાઇ જોગરાણા પણ ત્યાં આવી પહોચ્યાં હતા. તેમણે પણ તેને મારકુટ કરી હતી.
એટલું જ નહીં ઢસડીને નજીકની ડેરી સુધી લઇ ગયા હતા. ત્યાં પણ મારકુટ કરી સ્વીફ્ટ કારમાં ઉપાડી ગયા હતા. શાપરનાં ગોંડલ રોડ પાસેના પુલ બાજુ લઇ જઇ કારમાંથી નીચે ઉતારી ધોકા વડે તુટી પડયા હતા. એક શખ્સે છરી બતાવી કહ્યું કે તારા ભાઇને કહીં દે જે પાયલને ઘરે પરત મુકી જાય, બાકી તારા ભાઇની પણ આવી જ હાલત કરશું. આ પછી ફરીથી તેને ધોકા વડે માર માર્યો હતો.
બેભાન જેવો બની જતા ફરીથી મારકુટ કરી ઇનોવા કારમાં બેસાડી સીતારામ સોસાયટી પાસે કારમાંથી ધક્કો મારી નીચે પાડી દઇ જતા રહ્યા હતા. જતા-જતા પાયલને ઘરે પહોંચાડી દે જે બાકી જાનથી મારી નાખીશ, લાશને ગીરમાં ફેંકી દેશું, અમને કોઇ ફરક નહીં પડે, જેલમાં જવાથી અમે બીતા નથી તેમ કહ્યું હતું.
