વડોદરાઃ એમ.એસ.યુનિવર્સિટીની પોલીટેકનિકમાં પાંચ વર્ષ બાદ અભ્યાસક્રમમાં ફેરફારો કરવામાં આવ્યા છે.જેના કારણે નવા શૈક્ષણિક વર્ષથી પોલીટેકનિકના વિદ્યાર્થીઓ માટે ઈન્ટર્નશિપ ફરજિયાત બનશે.તેની સાથે સાથે બીજા નવા વિષયોનો પણ અભ્યાસક્રમમાં સમાવેશ કરવામાં આવ્યો છે.
મળતી વિગતો પ્રમાણે બદલાયેલા અભ્યાસક્રમમાં વિદ્યાર્થીઓને પ્રેક્ટિકલ શિક્ષણ મળે તેના પર ભાર મૂકાયો છે.પોલીટેકનિકના ઈન્ચાર્જ પ્રિન્સિપાલ ધનેશ પટેલનું કહેવું છે કે, બીજા અને ત્રીજા વર્ષની વચ્ચે વિદ્યાર્થીઓએ ઉદ્યોગોમાં ઈન્ટર્નશિપ કરવાની રહેશે. વિદ્યાર્થીઓને ઈન્ટર્નશિપની તક મળી રહે તે માટે કોલેજ દ્વારા ઉદ્યોગોની સાથે જોડાણ કરવામાં આવશે.તેની સાથે સાથે પોલીટેકનિકના દરેક વિભાગમાં ઈન્ડિયન નોલેજ સિસ્ટમ હેઠળ એક પેપરનો સમાવેશ કરાશે.તેની સાથે સાથે વિદ્યાર્થીઓ હ્યુમન વેલ્યુઝ એટલે કે માનવીય મૂલ્યોનો પણ અભ્યાસક્રમમાં સમાવેશ કરાયો છે.
આર્ટિફિશિયલ ઈન્ટેલિજન્સની વધતી જતી બોલબાલા વચ્ચે પોલીટેકનિકના વિદ્યાર્થીઓને એઆઈ તેમજ મશિન લર્નિગ અને કોમ્પ્યુટર વિઝન પણ ભણાવવાનું નક્કી કરાયું છે.આ ઉપરાંત ટેકનિકલ વિષયોમાં બીજા પણ બદલાવ કરવામાં આવ્યા છે.
એઆઈસીટીઈએ મંજૂરી આપી
પોલીટેકનિકમાં વધુ ૩૦૦ બેઠકો પર વિદ્યાર્થીઓને પ્રવેશ મળશે
દાયકાઓ બાદ પોલીટેકનિકની બેઠકોમાં પણ વધારો થવા જઈ રહ્યો છે.એઆઈસીટીઈ( ઓલ ઈન્ડિયા કાઉન્સિલ ફોર ટેકનિકલ એજ્યુકેશન) દ્વારા પોલીટેકનિકમાં કોમ્પ્યુટર એન્જિનિયરિંગની ૬૦, આઈટીની ૬૦, ઈલેટ્રિકલ એન્જિનિયરિંગની ૬૦, મીકેનિકલ એન્જિનિયરિંગની ૬૦, કેમિકલ એન્જિનિયરિંગની વધારાની ૬૦ બેઠકોને મંજૂરી આપવામાં આવી છે.આમ કુલ ૩૦૦ નવી બેઠકો પર વિદ્યાર્થીઓને પ્રવેશ મળશે.
હવે માત્ર ગુજરાત સરકારની મંજૂરી જ બાકી છે.આ બેઠકો હાયર પેમેન્ટ કેટેગરીની હશે.અત્યારે પોલીટેકનિકમાં જે હાયર પેમેન્ટ બેઠકો છે તેની ફી વાર્ષિક ૩૪૦૦૦ રુપિયા છે. નવી બેઠકો માટે સરકારની ફી કમિટિ પાસે ફી નક્કી કરવાનો પ્રસ્તાવ મોકલવામાં આવ્યો છે.પોલીટેકનિકમાં અત્યારે સિવિલ એન્જિનિયરિંગમાં ૧૮૦, મિકેનિકલ એન્જિનિરિંગમાં ૧૬૨, ઈલેક્ટ્રિકલમાં ૧૫૦, આઈટીમાં ૩૦ અને પેટ્રોકેમિકલમાં ૪૫ બેઠકો પર પ્રવેશ અપાય છે.
