– ધોળકામાં સાયબર ફ્રોડનો નવો કિમિયો
– યુવકની જાણ બહાર લોન મંજૂર કરી ગણતરીની મિનિટમાં લોનની રકમ સેરવી લેવાઇઃ પોલીસે તપાસ હાથ ધરી
ધોળકા : ધોળકામાં સાયબર ફ્રોડનો નવો કિમિયો સામે આવ્યો છે. ખાનગી કંપનીમાં નોકરી કરતા યુવકની જાણ બહાર ૭.૬૮ લોન મંજૂર કરાવી આરોપીઓ ગણતરીની મિનિટોમાં પાંચ લાખ ટ્રાન્સફર કરી લઇ છેતરપિંડી આચરી હતી. બનાવ અંગે પોલીસે ફરિયાદ નોંધી તપાસ હાથ ધરી છે.
ધોળકાના જલાલપુર વજીફા ગામના અને એસ્ટ્રલ પાઇપ્સ કંપનીમાં સિનિયર આસિસ્ટન્ટ તરીકે નોકરી કરતા વિશાલકુમાર ઘનશ્યામભાઈ પટેલના એચડીએફસી બેંકના ખાતામાં ૦૮/૧૨/૨૦૨૫ના રોજ સાંજે ૭.૨૦ વાગ્યે તેમની જાણ કે અરજી વગર રૂ.૭,૬૮,૦૦૦ની લોન જમા થયાનો મેસેજ આવ્યો હતો. આ મેસેજ મળ્યાની થોડી જ મિનિટોમાં, લોનની રકમમાંથી રૂ.૫,૦૦,૦૦૦ની મોટી રકમ કોઈ અજાણ્યા યુનિયન બેંક ઓફ ઈન્ડિયાના ખાતામાં ટ્રાન્સફર થઈ ગયાનો બીજો મેસેજ મળ્યો હતો.
પોતાના ખાતામાંથી મોટી રકમ ઉપડી જતાં ગભરાયેલા વિશાલકુમારે તાત્કાલિક તેમના ભાઈ અને મિત્રના ખાતામાં બાકીની રકમ ટ્રાન્સફર કરીને સુરક્ષિત કરી હતી. આ ઉપરાંત, તેમણે તાત્કાલિક સાયબર ફ્રોડની હેલ્પલાઈન ૧૯૩૦ પર ફરિયાદ નોંધાવી હતી અને પોતાનું લોનવાળું ખાતું બ્લોક કરાવ્યું હતું. બેંકમાંથી સ્ટેટમેન્ટ મેળવીને તેમણે એનસીઆરપી પોર્ટલ પર પણ અરજી કરી હતી, જેના આધારે ધોળકા ટાઉન પોલીસ સ્ટેશનમાં સોમવારે ગુનો નોંધવામાં આવ્યો છે. પોલીસ ઇન્સ્પેક્ટર જે.ડી. ડાંગરવાલા દ્વારા કેસ રજીસ્ટર કરીને આ ગુનામાં સંડોવાયેલ યુનિયન બેંક ઓફ ઈન્ડિયાના ખાતાધારક વિરુદ્ધ તપાસ હાથ ધરવામાં આવી છે.
