વડોદરા શહેરના પૂર્વ વિસ્તારમાં કલાદર્શનથી ડીપીએસ સ્કૂલ તરફ જતા રસ્તેથી પાલિકાના ડમ્પરમાં ખૂબ જ કચરો ભરીને ડ્રાઇવર જઈ રહ્યો હતો રસ્તા પર કચરો પડી રહ્યો હતો ત્યારે પાછળથી આવતા કોર્પોરેટરે ચાલકને રોકવા પ્રયાસ કરતા પૂરપાટ જતાં ડમ્પર ચાલકે કોર્પોરેટરના વાહન સાથે જ અકસ્માત સર્જી દીધો હતો. જોકે ચાલકે ખૂબ માફી માગી આજીજી કરતા કોઈપણ જાતની કાર્યવાહી વિના કોર્પોરેટરે તેને જવા દઈને વાહન ધીમે ચલાવવા સહિત કચરો ઓછો ભરવા સલાહ આપી હતી.
ઉલ્લેખનીય છે કે પૂર્વ વિસ્તારમાં કલાદર્શન ચાર રસ્તાથી ડીપીએસ સ્કૂલ તરફના રોડ રસ્તા પરથી પાલિકાના ડમ્પરમાં વધુ પ્રમાણમાં કચરો ભરીને પુરપાટ જતો હતો. પરિણામે રોડ રસ્તા પર ચારે બાજુએ કચરો ઉડીને પડતો હતો.
દરમિયાન વોર્ડ નં. 15ના કોર્પોરેટર આશિષ જોશી ડમ્પર પાછળ પોતાનું વાહન ચલાવીને જતા હતા. જેથી ચારે બાજુએ ડમ્પરનો કચરો ઉડતો જોઈને પોતાનું વાહન ડમ્પર ચાલકની આગળ લઈ તેને રોકવાનો પ્રયાસ કર્યો હતો. પરંતુ પૂરપાટ જતા ડમ્પર ચાલકે કોર્પોરેટરના વાહનને જ પાછળથી ડમ્પર અથાડી દીધું હતું.
