આર્થિક વહીવટ સામે વધુ એક વખત શંકાની સોય : 4 મહિના પહેલાં લોન્ડ્રી કોન્ટ્રાક્ટર કે સુપરવાઈઝરે ઓછાડ, પડદા, ઓપરેશન થિયેટરના કપડાં વગેરે ગુમ કરી દીધા બાદ ઢાંકપિછોડો
રાજકોટ, : રાજકોટ સિવિલ હોસ્પિટલનો આર્થિક વહીવટ ફરી વિવાદમાં આવ્યો છે, જેમાં 4 મહિના પહેલા લોન્ડ્રી કોન્ટ્રાક્ટર કે સુપરવાઈઝરે રૂા. 30 લાખથી વધુની કિંમતના ઓછાડ, પડદા, ઓપરેશન થિયેટરના કપડાં વગેરે ગુમ કરી દીધા બાદ પોલીસ ફરિયાદ નોંધાવવાના બદલે માત્ર નોટિસ આપીને ઢાંકપિછોડો કરવામાં આવ્યો હતો અને હવે શંકાસ્પદ રીતે ફક્ત રૂા. 8.51 લાખની વસૂલાત કરીને માંડવાળ કરી નાખવામાં આવતાં અનેક તર્ક-વિતર્કો ઉઠયા છે.
રાજકોટની પંડિત દીનદયાળ સરકારી હોસ્પિટલમાં એક મહિના પહેલા આરોગ્ય કમિશનરે રોગી કલ્યાણ સમિતિની બેઠક યોજી હતી અને દવાઓની ખરીદી સહિત રૂા. 20 કરોડના ખર્ચનો હિસાબ શંકાસ્પદ લાગતા તપાસનો આદેશ આપ્યો હતો, જે હજુ અધ્ધરતાલ છે ત્યાં જ હવે ધ્યાને આવ્યું છે કે, સિવિલ હોસ્પિટલમાં કપડાં ધોલાઈ (લોન્ડ્રી)નો કોન્ટ્રાકટ ધરાવતી અમદાવાદની સાહસ સોલ્યુશન પેઢી તરફથી ગત જૂન મહિના આસપાસ ઓછાડ, પડદા, ઓશિકાના કવર, ઓપરેશન થિયેટરમાં વપરાતા કપડાં વગેરે ધોવા માટે લઈ ગયા બાદ પરત આપ્યા નહોતા. જેથી સિવિલ હોસ્પિટલના વહીવટી વિભાગ દ્વારા રૂા. 30 લાખથી વધુની કિંમતના કપડાં પરત મેળવા માટે સાહસ સોલ્યુશન કંપનીના રૂા. 9-9 લાખના 3 બિલ અટકાવીને કોન્ટ્રાકટર વિરૂદ્ધ ફોજદારી પગલાં ભરવા સહિતની કાર્યવાહી માટે નોટિસ ફટકારી હતી.
જો કે, લોન્ડ્રી કોન્ટ્રાક્ટર સાહસ સોલ્યુશન પેઢીના સંચાલકે નોટિસ મળતા જ જવાબદારીમાંથી બચવા માટે પોતાની જ પેઢીના સુપરવાઈઝર એવા પિતરાઈ ભાઈ સહિતના માણસો વિરૂદ્ધ પોલીસ કમિશનર અને પોલીસ મથકમાં અરજી કરીને તેઓ કાવતરૂં ઘડીને સિવિલ હોસ્પિટલના કપડાં અને ઈકો ગાડી ઉઠાવી ગયાનો આક્ષેપ કર્યો હતો. બાદમાં ચાર મહિના વિતી ગયા પણ સિવિલ હોસ્પિટલ તરફથી કોન્ટ્રાક્ટર સામે કે કોન્ટ્રાક્ટર તરફથી સુપરવાઈઝરની ટોળકી સામે એફઆઈઆર નોંધાવાઈ નથી. પરંતુ હવે ખુલ્યું છે કે, સિવિલ હોસ્પિટલ તંત્ર દ્વારા રૂા. 30 લાખથી વધુની કિંમતના ગણાતા કપડાં પરત મેળવવાનું જતું કરીને ફક્ત રૂા. 8.51 લાખમાં કોન્ટ્રાક્ટર સાથે માંડવાળ કરી લેવામાં આવી છે. પરિણામે હવે આ બાબતે પણ આરોગ્ય કમિશનર કક્ષાએથી તપાસ-કાર્યવાહી થાય એવું લાગે છે.
