Vadodara : વડોદરા કોર્પોરેશન દ્વારા અકોટા સ્ટેડિયમ ખાતે આયોજિત “રાત્રી બી ફોર નવરાત્રી” કાર્યક્રમમાં મોટો વાદ-વિવાદ સર્જાયો હતો. આ સ્ટેડિયમ બરોડા આઇટી એસોસિયેશન (બીટા ગરબા)ને ફાળવવામાં આવ્યું હતું. પરંતુ ભારે વરસાદને કારણે મેદાન ઉબડખાબડ બની જતાં કોર્પોરેશનના કર્મચારીઓ તેને સમતલ કરવા માટે મટીરીયલ પાથરવા પહોંચ્યા હતા. તે દરમિયાન ગરબા આયોજકો અને કોર્પોરેશન વચ્ચે તણાવ સર્જાયો હતો. દરમિયાન, મટીરીયલ નહીં પાથરવા દઈ બીટા ગરબા આયોજકોએ કોર્પોરેશનના કોન્ટ્રાક્ટરના ડ્રાઈવરને માર માર્યો હોવાનો આક્ષેપ થયો હતો. ઘટના અંગે કોર્પોરેશન દ્વારા અકોટા પોલીસ મથકે ફરિયાદ નોંધાવતાં પોલીસએ આયોજક જીતેન્દ્ર પટેલ અને હરજીતસિંહ સોઢી વિરુદ્ધ કાયદેસરની કાર્યવાહી હાથ ધરી હતી.
આ ઘટનાને પગલે મ્યુનિસિપલ કમિશનર અરુણ મહેશ બાબુએ કડક વલણ અપનાવી તાત્કાલિક ધોરણે બીટા ગરબાને ફાળવાયેલ અકોટા સ્ટેડિયમની મંજૂરી રદ કરી હતી. આ નિર્ણયથી આયોજકો અને ખેલૈયાઓમાં ભારે નિરાશા ફેલાઈ હતી. નાગરિકોની લાગણી અને પરંપરા પ્રત્યે સન્માન દર્શાવતા વડોદરા કોર્પોરેશને આજરોજ જાહેરાત કરી કે અકોટા સ્ટેડિયમ ખાતે બીટા ગરબા યોજવાની મંજૂરી ફરી બહાલ કરવામાં આવી છે. કોર્પોરેશનના જનસંપર્ક વિભાગ દ્વારા જણાવાયું કે વડોદરા “સાંસ્કૃતિક અને કલાનગરી” તરીકે ઓળખાય છે, જ્યાં નવરાત્રી પર્વ નવ દિવસ સુધી રંગે-ચંગે ઉજવાય છે. નાગરિકોની શ્રદ્ધા અને ખેલૈયાઓના ઉત્સાહને ધ્યાનમાં રાખી, ફક્ત અને ફક્ત લોકોની ભાવના જાળવી રાખવા માટે મંજૂરી આપવામાં આવી છે. આ નિર્ણયથી ફરી એક વાર શહેરના ખેલૈયાઓમાં ખુશીની લહેર વ્યાપી છે.
