Vadodara WPL Final : વડોદરાના કોટંબી સ્થિત બરોડા ક્રિકેટ એસોસિએશન (BCA) સ્ટેડિયમ ખાતે આવતીકાલે વિમેન્સ પ્રીમિયર લીગ (WPL)ની ભવ્ય ફાઈનલ મેચ યોજાનારી છે, જેમાં દિલ્હી કેપિટલ્સ અને રોયલ ચેલેન્જર્સ બેંગલુરુ વચ્ચે ખિતાબ માટે ટક્કર થશે.
કોટંબી સ્ટેડિયમ ખાતે તા.19 જાન્યુઆરીથી WPLની મેચો રમાઈ રહી છે. લીગ દરમિયાન અત્યાર સુધીમાં કુલ 10 મેચોમાં વિવિધ ટીમો વચ્ચે રોમાંચક મુકાબલા જોવા મળ્યા હતા.
ગઈકાલે યોજાયેલી એલિમિનેટર મેચમાં દિલ્હી કેપિટલ્સ અને ગુજરાત જાયન્ટ્સ આમને-સામને આવ્યા હતા. આ મેચમાં ગુજરાત જાયન્ટ્સે 20 ઓવરમાં 7 વિકેટ ગુમાવી 168 રન બનાવ્યા હતા. જવાબમાં દિલ્હી કેપિટલ્સે આ લક્ષ્યાંકને સહેલાઈથી હાંસલ કરતા 15.4 ઓવરમાં 169 રન બનાવી 7 વિકેટે વિજય મેળવ્યો હતો. આ વિજય સાથે દિલ્હી કેપિટલ્સે ફાઈનલમાં સ્થાન પાક્કું કર્યું છે, જ્યાં હવે તેમની ટક્કર રોયલ ચેલેન્જર્સ બેંગલુરુ સાથે થશે.
લીગ દરમ્યાન મુંબઈ ઇન્ડિયન્સે 8 મેચમાંથી માત્ર 3 મેચોમાં જીત મેળવી હતી, જ્યારે યુપી વોરિયર્સ માત્ર 2 મેચ જીતતા નબળું પ્રદર્શન રહ્યું હતું.
લીગ દરમિયાન ચાહકોના મતોના આધારે 100 ખેલાડીઓની સરેરાશ રેન્કિંગ તૈયાર કરવામાં આવી હતી. તેમાં રોયલ ચેલેન્જર્સ બેંગલુરુની નાદીન ડી ક્લાર્ક, રીચા ઘોષ, લોરેન બેલ અને સ્મૃતિ મંધાના, મુંબઈ ઇન્ડિયન્સની નિકોલા કેરી તેમજ ગુજરાત જાયન્ટ્સની સોફી ડિવાઇન સહિતના ખેલાડીઓ ટોચના સ્થાને રહ્યા હતા.
બેટિંગમાં સૌથી વધુ રન કરનાર ખેલાડી તરીકે મુંબઈ ઇન્ડિયન્સની હરમનપ્રીત કૌર ઝળહળી હતી. તેણે 8 મેચમાં 150.66ના શાનદાર સ્ટ્રાઈક રેટથી કુલ 342 રન બનાવ્યા હતા. જ્યારે બોલિંગમાં ગુજરાત જાયન્ટ્સની સોફી ડિવાઇને 9 મેચમાં સૌથી વધુ 17 વિકેટ ઝડપી પોતાનું પ્રભુત્વ સાબિત કર્યું હતું.
હવે આવતીકાલે યોજાનારી ફાઈનલ મેચમાં કોણ ચેમ્પિયન બનશે તે જાણવા ક્રિકેટપ્રેમીઓમાં ભારે ઉત્સુકતા જોવા મળી રહી છે.
