વડોદરાઃ વડોદરા શહેર પોલીસ દ્વારા ગુજસીટોક હેઠળ એક પછી એક ગેંગ સામે સકંજો કસવાને કારણે તેમજ શહેરમાં ૮ હજારથી વધુ સીસીટીવીને કારણે ગુનાખોરી પર અસર જોવા મળી છે અને વર્ષ-૨૦૨૪ની સરખામણીમાં વર્ષ-૨૦૨૫માં ગુનાઓના પ્રમાણમાં ૬.૧૭ ટકાનો ઘટાડો થયો છે.જો કે અછોડા જેવી ચોરીના બનાવોમાં ૩.૫૪ ટકાનો વધારો થયો છે.
વડોદરા શહેર પોલીસ કમિશનર દ્વારા જુદીજુદી બ્રાન્ચોને કામગીરી સોંપી ઘરફોડ ચોરીઓ,અછોડા,કારના કાચ તોડી સામાન ચોરી,એટીએમમાં ઠગાઇ કરતી,વાહનચોરી સહિતના મિલકત સબંધી ગણાતા ગુનાઓ કાબૂમાં લેવા માટે સિકલીગર ગેંગ,ત્રીચી ગેંગ,કાસમ આલા ગેંગ,સુનિલ પાન ગેંગ,બાવરી ગેંગ વગેરે સામે ગુજસીટોક સહિતની કામગીરી કરી હતી.
ગુનેગારો સામે લીધેલા પગલાંની અસર મિલકત સબંધી ગુનાઓ પર સારી દેખાઇ છે.પરિણામે,વર્ષ-૨૦૨૪ની તુલનામાં વર્ષ-૨૦૨૫ના આંકડા જોતાં દિવસની ઘરફોડ ચોરીના બનાવો ૨૪થી ઘટીને ૧૪ અને રાતની ઘરફોડ ચોરીના બનાવો ૧૯૩ થી ઘટીને ૧૨૮ થયા છે.
આ જ રીતે વાહનચોરીના બનાવો વર્ષ-૨૦૨૪માં ૪૨૦ હતા અને વર્ષ-૨૦૨૫માં ઘટીને ૩૦૦ થતાં ૨૮ ટકાનો ઘટાડો થયો છે.જ્યારે,લૂંટના બનાવો ૧૧થી ઘટીને ૭ થયા છે.સૌથી વધુ ડિટેક્શન અછોડાતોડવાના બનાવોમાં થયું છે.જેમાં ગયા વર્ષે ૮૮.૨૪ ટકા ગુના શોધી કાઢવામાં આવ્યા હતા અને વર્ષ-૨૦૨૫માં ડિટેક્શનની ટકાવારી ૯૩.૭૫ ટકા થઇ છે.એકંદરે મિલકત સબંધી કુલ ગુના૯૦૭થી ઘટીને ૮૫૧ થતાં ૬.૧૭ ટકાનો ઘટાડો થયો છે.
ખૂન,અપહરણ,રેપ જેવા શરીર સબંધી ગુનાના આંકડા જાહેર ન કર્યા
શહેર પોલીસ દ્વારા મિલકત સબંધી ગુનાઓમાં થયેલો ઘટાડો અને વધેલા ડિટેક્શનની કામગીરી રજૂ કરવામાં આવી છે.પરંતુ ખૂન,અપહરણ,ખૂનનો પ્રયાસ,અકસ્માત,બળાત્કાર જેવા શરીર સબંધી ગુનાઓના પ્રમાણના ગત વર્ષની સરખામણીના આંકડા જાહેર કરવામાં આવ્યા નથી.
કામગીરી દેખાડવા ગુના ડિટેક્ટ થાય પછી ફરિયાદ નોંધવાની પ્રથા
ઘણા પોલીસ સ્ટેશનોમાં સારી કામગીરી દેખાય અને ગુનાનું પ્રમાણ વધુ ના દેખાય તેવા પ્રયાસના ભાગરૃપે માત્ર અરજી પર તપાસ કરવામાં આવતી હોય છે અને આરોપી પકડાય પછી ફરિયાદ નોંધાતી હોય છે.વાહનચોરી જેવા કિસ્સામાં આવી પધ્ધતિ વધુ જોવા મળતી હોય છે.
વડોદરા શહેરની ગુનાખોરીની સરખામણીના આંકડા
ગુનાનો પ્રકાર વર્ષ-૨૦૨૪ વર્ષ-૨૦૨૫ વધઘટ ટકા
-ધાડ ૧ – -૧૦૦
-લૂંટ ૧૧ ૭ -૩૬.૩૬
-અછોડા અને
બીજી ચોરીઓ ૬૪૮ ૭૦૨ +૩.૫૪
-દિવસની ચોરી ૨૪ ૧૪ -૪૧.૬૭
-રાતની ચોરી ૧૯૩ ૧૨૮ -૩૩.૬૮
કુલ ૯૦૭ ૮૫૧ -૬.૧૭
