Vadodara Gas Refilling Scam :વડોદરાના ફતેગજમાં જયેશ કોલની પાસે રહેતા ભાવનાબેન અશોકભાઈ પટેલની રૂપમ સિનેમા સંગમ પાસે 24 વર્ષથી ભારત ગેસની રામદેવ ગેસ એજન્સી છે. તેનું ગોડાઉન કોટાલી ગામ ગોલ્ડન ચોકડી પાસે આવેલું છે. તેમણે માંજલપુર પોલીસ સ્ટેશનમાં ફરિયાદ નોંધાવી જણાવ્યું છે કે ગત 20 સપ્ટેમ્બરે સવારે ગોડાઉનથી હસમુખભાઈ હીરાભાઈ પટેલે છોટાહાથી ટેમ્પોના ડ્રાઈવર સુનિલ ચંદુભાઈ તથા ડિલિવરી બોય વિશાલ નગીનભાઈ સોલંકી બંને (રહે-એકતા નગર, આજવા રોડ)ને એલપીજીના 36 બોટલ વજન કરીને ડિલિવરી માટે આપ્યા હતા. ડ્રાઇવર અને ડીલીવરી બોય બંને માંજલપુર મારુતિ ધામ સોસાયટીમાં બોટલની ડિલિવરી કરવા ગયા હતા ત્યારે એક ગ્રાહકને ગેસના બોટલમાં વજન ઓછું લાગતા તેને પોલીસમાં જાણ કરી હતી.
ત્યારબાદ માંજલપુર પોલીસ બંનેને પોલીસ સ્ટેશન લઈ ગઈ હતી. તપાસ દરમિયાન જાણવા મળ્યું હતું કે બંને આરોપીઓ ગેસના ભરેલા બોટલમાંથી ખાલી બોટલમાં થોડો ગેસ કાઢી ફરીથી બોટલ સીલ કરી દેતા હતા અને આ રીતે ગેસની ચોરી કરતા હતા. બંને આરોપીઓ જાહેરમાં ગેસ કાઢી લોકોનો જીવ જોખમમાં મૂકતા હતા તેમજ ગ્રાહકોને પણ ઓછો ગેસ આપે છેતરપિંડી કરતા હતા. ઉલ્લેખનિય છે કે અતિ ગંભીર બાબતે પણ ગેસ એજન્સીના સંચાલકને ફરિયાદ કરવા માટે 40 દિવસ લાગી ગયા.
