Vadodara Visa Fraud : વડોદરાના માંજલપુર વિસ્તારમાં વિદેશ મોકલવાના બહાને લોકો સાથે છેતરપિંડી કરતા ભેજાબાજ મિલીન પટેલ સામે લંડન મોકલવાના બહાને પોરની એક યુવતી સાથે રૂા.15 લાખની છેતરપિંડી કરી હોવાની વધુ એક ફરિયાદ દાખલ થઇ છે.
પોરમાં કાયાવરોહણરોડ પર ગોવિંદપાર્ક સોસાયટીમાં રહેતા રાજેન્દ્ર કરસનદાસ મહંતે વરણામા પોલીસ સ્ટેશનમાં મિલીન ઈન્દ્રવદન પટેલ (રહે.સોનલપાર્ક, માંજલપુર, મૂળ કંડારી, તા.કરજણ) સામે નોંધાવેલી ફરિયાદમાં જણાવ્યું છે કે મારી પુત્રી શિવાંગીને લંડન જવાનું હોવાથી પોરમાં તેની ફ્રેન્ડ હેતલ સાથે વાત થઈ હતી. બાદમાં તેમને મિલીન સાથે ફોન પર વાત કરતા મિલીને માંજલપુરમાં તુલસીધામરોડ પર લીલેરિયા પેરામાઉન્ટ ખાતે માર્ચ-2023માં બોલાવ્યા હતાં. મિલીને લંડન મોકલવા માટે રૂા.15 લાખ ખર્ચ થશે તેમ કહ્યું હતું.
ત્રણ દિવસ બાદ મિલીન પોર ખાતે પોર પેલેસ હોટલ પર આવ્યો હતો અને શિવાંગી પાસેથી ડોક્યૂમેન્ટ તેમજ રૂા.28 હજાર રોકડ લીધા હતા. ત્યારબાદ મિલીને તેના એકાઉન્ટમાં પૈસા જમા કરાવવાનું કહેતા તબક્કાવાર રૂા.15 લાખ જમા કરાવ્યા હતા. લંડન જવા માટે બે વર્ષ સુધી મિલીને કોઈ પ્રોસિજર નહી કરતા તેની પાસે પૈસા પરત માંગ્યા હતાં જેથી તેણે બે ચેક આપ્યા હતાં જો કે આ ચેક પરત જણાતા વરણામા પોલીસ સ્ટેશનમાં અરજી આપી હતી.
તે સમયે મિલીને સમાધાન કરી પૈસા પરત કરવા માટે ચેક આપ્યા હતાં. આ ચેક પણ બેંકમાં જમા કરાવતા તે પરત ફર્યા હતાં. દરમિયાન મિલીને તા.9 ઓગસ્ટ 2025ના રોજ લંડનના વિઝાનો સ્ક્રિન શોટ શિવાંગીના મોબાઈલ પર મોકલ્યો હતો. આ વિઝા અંગે તપાસ કરાવતા તે બોગસ હોવાનું જણાયું હતું. ત્યારબાદ મિલીન પાસે પૈસાની માંગણી કરતા તે આપતો ન હતો અને છેલ્લે પૈસા પરત કરવાની સ્પષ્ટ ના પાડી દીધી હતી. ઉલ્લેખનીય છે કે મિલીન પટેલ સામે બે દિવસ પહેલાં પણ દંપતીને કેનેડા મોકલવાના બહાને લાખો રૂપિયા પડાવ્યા હોવાની ફરિયાદ દાખલ થઇ હતી.
