વડોદરા શહેરમાં આકરી ગરમીની વચ્ચે મ્યુનિસિપલ કોર્પોરેશનની ચૂંટણી માટે મતદાન દરમિયાન ઘણા બૂથો પર પાંખી હાજરી જોવા મળી હતી તો કેટલાક મતદારો વિકટ પરિસ્થિતિ હોવા છતા મતદાન મથક પર મતદાન કરવા પહોંચ્યા હતા અને બીજા મતદારો માટે પ્રેરણારુપ બન્યા હતા.
શહેરના ગોત્રી વિસ્તારના એક મતદાન મથક પર વ્હીલચેરમાં બેસીને મતદાન કરવા માટે પહોંચેલા હેમાબેન ગાંધીએ કહ્યું હતું કે, તાજેતરમાં જ મને અકસ્માત થયો હતો અને તેના કારણે મને પગમાં 35 ટાંકા લેવા પડયા છે. આમ છતા મેં નક્કી કર્યું હતું કે, ગમે તે થાય પણ મતદાન તો કરીશ જ.એટલે વ્હીલચેરમાં બેસીને મતદાન કરવા માટે આવી છું.
તેમણે કહ્યું હતું કે, શહેરમાં લોકો ઘણી બધી સમસ્યાનો સામનો કરી રહ્યા છે અને આ સમસ્યાઓનો ઉકેલ આવે તેવી આશા સાથે મેં આજે વોટ આપ્યો છે.
