– પોલીસની રહેમનજર હેઠળ શહેરી વિસ્તારમાં નિયમોનું ઉલ્લંઘન
– અકસ્માતના પગલે ટ્રાફિકજામ થતાં પોલીસ દોડી આવીને પૂર્વવત કરાવ્યો, ડમ્પર ચાલક પકડાયો
સુરેન્દ્રનગર : સુરેન્દ્રનગરના વઢવાણ રોડ પર ઉપાસના સર્કલ પાસે પૂરપાટ ઝડપે દોડતા ડમ્પરના ચાલકે બાઈકને અડફેટે લેતા બાઈક ચાલક યુવકનું ઘટના સ્થળે મોત નિપજ્યું હતું. આ મામલે ડમ્પર ચાલક સામે પોલીસે કાર્યવાહી હાથ ધરી છે.
સુરેન્દ્રનગર-વઢવાણ રોડ પર પૂરપાટ ઝડપે જઈ રહેલા ડમ્પરના ચાલકે ઉપાસના સર્કલ પાસે રોડ પર જતા બાઈક ચાલકને અડફેટે લઇને અકસ્માત સર્જાયો હતો. જેમાં બાઈક ચાલક યુવકને ગંભીર ઈજા થતાં ઘટના સ્થળે જ મોત નિપજ્યું હતું. આ બનાવને પગલે લોકોના ટોળેટોળા સ્થળ પર ઉમટી પડયા હતા અને પોલીસને જાણ કરતા ઘટના સ્થળે પહોંચી વધુ તપાસ હાથ ધરી હતી. જ્યારે પ્રાથમિક તપાસમાં મૃતક બાઈક ચાલક યુવક અક્ષય નંદાસણીયા હોવાનું બહાર આવ્યું હતું. આ અકસ્માતને પગલે ટ્રાફિક જામ થયો હતો. જેને પોલીસે દોડી આવીને ટ્રાફિકને હળવો કર્યો હતો જ્યારે અકસ્માત સર્જનાર ડમ્પર ચાલકને ઝડપી પાડી બી-ડિવિઝન પોલીસ મથકે લાવી કાયદેસરની કાર્યવાહી હાથ ધરી હતી. અત્રે ઉલ્લેખનીય છે કે શહેરી વિસ્તારમાંથી ડમ્પર સહિતના ભારે વાહનો પસાર થવા અંગે તંત્રનું જાહેરનામું હોવા છતાં નિયમોનું ઉલ્લંઘન કરી પુરઝડપે ડમ્પરો પસાર થતાં અગાઉ પણ અનેક લોકોના મોત નીપજી ચુક્યા છે. ત્યારે આવા ડમ્પર ચાલકો સામે કડક કાર્યવાહી કરવામાં આવે તેવી માંગ ઉઠવા પામી છે.
