World Table Tennis Feeder : વર્લ્ડ ટેબલ ટેનિસ ફીડર સિરીઝની શરૂઆત રોમાંચક મુકાબલાઓ સાથે થઈ. મિક્સ્ડ ડબલ્સ ક્વોલિફાઇંગ રાઉન્ડમાં સાર્થક આર્ય અને હાર્દી પટેલે ત્રીજા ક્રમાંકિત સ્નેહિત સુરવજ્જુલા અને સયાલી વાનીની મજબૂત જોડીને કડક સ્પર્ધામાં 5-11, 11-9, 11-9, 9-11, 12-10થી પરાજય આપી આગળ વધ્યા.
સિંગલ્સ ગ્રુપ સ્ટેજમાં ટોચના ખેલાડીઓએ પોતાની શરૂઆતની મેચોમાં દમદાર દેખાવ કર્યો. પુરુષ સિંગલ્સમાં યશાંશ મલિક, સંયોગ કપાલી અને જશ મોદીએ પોતાની પ્રથમ મેચ જીતેલી, જ્યારે મહિલા સિંગલ્સમાં સેલેના સેલ્વાકુમાર, નિત્યા મણિ અને સંપદા ભિવંડીકરે વિજય સાથે અભિયાન શરૂ કર્યું છે.
પુરુષ સિંગલ્સના ગ્રુપ-1માં યશાંશ મલિકને પ્રેયેશ સુરેશે કઠિન મુકાબલામાં પડકાર આપ્યો, જ્યારે ગ્રુપ-2માં સંજય કપિલાએ હર્ષ મેરોથાને હરાવ્યો. ગ્રુપ-3માં જશ મોદીએ નેપાળના રૂબિન મહાજન સામે પ્રભુત્વ જમાવ્યું હતું.
મહિલા સિંગલ્સમાં ગ્રુપ-1માં સેલેના સેલ્વાકુમારે મુક્તા દલવીને પરાજય આપ્યો, ગ્રુપ-2માં નિત્યા મણિએ સમૃદ્ધિ વણિકને હરાવી અને ગ્રુપ-3માં સંપદા ભિવંડીકરે યુવા નૈશા રેવાસ્કર સામે જીત મેળવી. ગ્રુપ-5માં ઉભરતી ખેલાડી તનિષ્કા કાલભૈરવે યાશિની શિવશંકરને હરાવી આશ્ચર્યજનક પરિણામ આપ્યું, જ્યારે ગ્રુપ-6માં સેનહોરા ડિસોઝા આફ્રીન મુરાદ સામે પરાજિત થઈ હતી.
અગાઉ મિક્સ્ડ ડબલ્સ ક્વોલિફાઇંગના પ્રથમ રાઉન્ડમાં ધૈર્ય પરમાર અને અનુષા કુટુંબલેની યુવા જોડીએ રાજીવ સાહુ અને પ્રણતિ રમેશની જોડી સામે જીત મેળવી હતી. હવે બીજા રાઉન્ડમાં તેમનો સામનો બીજા ક્રમાંકિત અભિનંદન પ્રધિવધિ અને નિત્યા મણિની મજબૂત જોડી સાથે થશે.
(ડાબેથી ભારતના નંબર વન માનુષ શાહ અને ગુજરાતના નંબર વન પ્રથમ મદલાણી)
ભારતના નંબર વન માનુષ શાહે ઘરઆંગણે યોજાયેલી ઇન્ટરનેશનલ ટુર્નામેન્ટની સફળતા અંગે આશા વ્યક્ત કરી
ભારતના નંબર વન ખેલાડી માનુષ શાહે 150થી વધુ વખત આંતરરાષ્ટ્રીય સ્તરે દેશનું પ્રતિનિધિત્વ કરી 80થી વધુ મેડલ હાંસલ કર્યા છે. તેમણે જણાવ્યું હતું કે રમત કોઈપણ હોય તેમાં પડકારો તો રહે જ છે, પરંતુ સતત મહેનત અને ધીરજથી જ સફળતા પ્રાપ્ત કરી શકાય છે.
વડોદરામાં ઘર આંગણે યોજાયેલી આ આંતરરાષ્ટ્રીય ટુર્નામેન્ટ સફળ થાય તેવી આશા વ્યક્ત કરતા તેમણે પોતાની વ્યક્તિગત સફળતા અંગે પણ આત્મવિશ્વાસ વ્યક્ત કર્યો હતો. તેમણે ઉમેર્યું હતું કે, છેલ્લા કેટલાક વર્ષોમાં દેશમાં રમતગમતના ક્ષેત્રે નોંધપાત્ર સુધારા થયા છે અને ખેલાડીઓ માટે અનેક નવી તકો ઊભી થઈ છે. માનુષ શાહે વધુમાં જણાવ્યું હતું કે વધુમાં વધુ લોકો સ્પોર્ટ્સ પ્રત્યે રસ દાખવે તે જરૂરી છે, કારણ કે રમતગમત માત્ર સફળતા પૂરતી નહીં પરંતુ સારું સ્વાસ્થ્ય જાળવવામાં પણ મહત્વપૂર્ણ ભૂમિકા ભજવે છે.
ગુજરાતના નંબર વન પ્રથમ મદલાણીએ સ્પર્ધામાં નોંધાવી દાવેદારી, વડોદરાવાસીઓને મેચ નિહાળવાની અપીલ
મૂળ પોરબંદર રહેવાસી અને હાલ સુરતમાં પ્રેક્ટિસ કરતા ગુજરાતના નંબર વન પ્રથમ મદલાણીએ આગામી સ્પર્ધામાં પોતાની દાવેદારી નોંધાવી છે. રાષ્ટ્રીય તેમજ આંતરરાષ્ટ્રીય સ્તરે દેશનું પ્રતિનિધિત્વ કરી ગૌરવ અપાવનાર પ્રથમ મદલાણીએ પોતાની સફળતા પાછળ પરિવાર, મિત્રો, સંસ્થાઓ અને કોચના મહત્વપૂર્ણ યોગદાનને શ્રેય આપ્યો હતો.
તેમણે જણાવ્યું હતું કે, સિનિયર ખેલાડીઓ પાસેથી મળેલ માર્ગદર્શન અને અનુભવથી પોતાની રમત વધુ મજબૂત બની છે. આ સ્પર્ધામાં મેચ અગાઉ પ્રેક્ટિસ માટે જરૂરી વ્યવસ્થા ઉપલબ્ધ હોવાથી ખેલાડીઓને તૈયારી માટે પૂરતો સમય મળે છે. રમવા માટેનું વાતાવરણ પણ અનુકૂળ હોવાનું તેમણે ઉમેર્યું હતું.
સફળતા માટે ખેલાડીઓએ સતત અને વધુમાં વધુ પ્રેક્ટિસ કરવી જોઈએ તેમજ આવી પ્રતિષ્ઠિત ટુર્નામેન્ટોમાં ફરજિયાત ભાગ લેવો જોઈએ તેમ તેમણે જણાવ્યું હતું. વડોદરાના આંગણે દેશ-વિદેશના ટોચના ખેલાડીઓ રમી રહ્યા હોવાથી દર્શકોએ આ સુવર્ણ તક ગુમાવવી નહીં જોઈએ એવી અપીલ પણ પ્રથમ મદલાણીએ કરી હતી. તેમણે વધુમાં જણાવ્યું હતું કે, દર્શકોના ઉત્સાહ અને પ્રોત્સાહનથી ખેલાડીઓને રમતમાં વધારાનો જુસ્સો મળે છે, જે સફળતા માટે અત્યંત મહત્વપૂર્ણ છે.
