નવી દિલ્હી : છેલ્લા ત્રણ વર્ષમાં ભારતીય પરિવારોનો સરેરાશ ત્રિમાસિક ખર્ચ ૩૩ ટકાથી વધુ વધીને રૂ. ૫૬,૦૦૦ થયો છે. શહેરી અને ગ્રામીણ ભારતમાં વપરાશ વર્તન પર ‘વર્લ્ડપેનલ બાય ન્યુમેરેટર’ દ્વારા એક અહેવાલમાં આ વાત કહેવામાં આવી છે. દર વર્ષે ઘરગથ્થુ ખર્ચમાં નોંધપાત્ર વધારો થયો છે, ખાસ કરીને શહેરી વિસ્તારોમાં. જોકે, હવે ગ્રામીણ વિસ્તારોમાં પણ ખર્ચમાં વધારો થયો છે.
રિપોર્ટ મુજબ, ઘરગથ્થુ ખર્ચ સતત વધી રહ્યો છે. સરેરાશ ત્રિમાસિક ખર્ચ ૨૦૨૨માં લગભગ ૪૨,૦૦૦ રૂપિયાથી વધીને ૨૦૨૫માં ૫૬,૦૦૦ રૂપિયાથી વધુ થયો છે.
શહેરી પરિવારો સૌથી વધુ ખર્ચ કરી રહ્યા છે, પરંતુ હવે ગ્રામીણ પરિવારોમાં પણ તેમાં તીવ્ર ઉછાળો જોવા મળ્યો છે, જે દેશભરના બજેટ પર વધતા દબાણને રેખાંકિત કરે છે.
શહેરી બજારોમાં સરેરાશ ત્રિમાસિક ખર્ચ જૂન ૨૦૨૨માં ૫૨,૭૧૧ રૂપિયા હતો અને માર્ચ ૨૦૨૪માં ૬૪,૫૮૩ રૂપિયા અને માર્ચ ૨૦૨૫માં ૭૩,૫૭૯ રૂપિયા થયો છે. તેવી જ રીતે, ગ્રામીણ પરિવારોનો સરેરાશ ત્રિમાસિક ખર્ચ જૂન ૨૦૨૨માં ૩૬,૧૦૪ રૂપિયા હતો અને માર્ચ ૨૦૨૫માં ૪૬,૬૨૩ રૂપિયા થયો છે. આ અહેવાલ ૬,૦૦૦ પરિવારો વચ્ચે કરવામાં આવેલા સર્વે પર આધારિત છે.
