Vadodara News : વડોદરાના ન્યૂ વી.આઈ.પી. રોડ પર ખોડિયારનગર પાસે આવેલા અર્થ આઈકોનમાં ઓફિસ ધરાવતા બે એજન્ટ ભાઈઓએ વિદેશમાં નર્સની નોકરી અપાવવાનું કહીને બે યુવતીઓ પાસેથી કુલ રૂ. 10.60 લાખ પડાવી લીધા હોવાની ચોંકાવનારી ઘટના સામે આવી છે. આણંદ જિલ્લાના બોરસદ તાલુકાના નાપા ગામની એકતાનગર કોલોનીમાં રહેતા અને નર્સિંગ ટ્યુટર તરીકે નોકરી કરતા નિકિતાબેન જયંતિભાઈ રોહિતે આ અંગે વડોદરાના વારસિયા પોલીસ સ્ટેશનમાં ફરિયાદ નોંધાવી છે. જેમાં પોલીસે જશવંત ચૌધરી અને તેના ભાઈ દુષ્યંત ચૌધરી સામે ગુનો દાખલ કરીને કાયદેસરની કાર્યવાહી હાથ ધરી છે.
સોશિયલ મીડિયા પર જાહેરાત જોઈને યુવતીઓ જાળમાં ફસાઈ
ફરિયાદની વિગતો અનુસાર, નિકિતાબેને વર્ષ 2024 માં સોશિયલ મીડિયા પર જશવંત ચૌધરીની એકનાથ ઇમિગ્રેશન કન્સલટન્સીની વિગતો જોઈ હતી. નિકિતાબેન અને તેમની મિત્ર સિમરન ઈશ્વરભાઈ પરમાર ઓસ્ટ્રિયા (યુરોપ) ખાતે નર્સિંગની નોકરી કરવા જવા ઈચ્છતા હોવાથી તેઓ જશવંત ચૌધરીની ઓફિસે મળવા ગયા હતા. એજન્ટે તેમને યુરોપમાં નર્સિંગની નોકરીની પાકી ખાતરી આપીને ચાર મહિનામાં પ્રોસેસ પૂરી કરવાનું વચન આપ્યું હતું અને વ્યક્તિદીઠ 6 લાખનો ખર્ચ જણાવ્યો હતો. વિશ્વાસમાં આવીને નિકિતાબેને શરૂઆતમાં રૂ. દોઢ લાખ ચૂકવ્યા હતા.
આ પણ વાંચો : વૈભવે મેદાન ધ્રુજાવ્યું: એક પણ સિંગલ લીધા વિના અર્ધસદી, 10 ચોગ્ગા, 8 છગ્ગા… 20 વર્ષ જૂનો વર્લ્ડ રેકોર્ડ તોડ્યો
ખોટો ઓફર લેટર આપી લાખો રૂપિયા પડાવ્યા, અન્ય લોકો પણ ફસાયાની આશંકા
ઓક્ટોબર 2025 માં જશવંતના ભાઈ દુષ્યંત ચૌધરીએ યુવતીઓના પાસપોર્ટ નંબરનો ઉલ્લેખ કરેલો એક ઓફર લેટર આપ્યો હતો અને જણાવ્યું હતું કે, 10 નવેમ્બર 2025ના રોજ ઓસ્ટ્રિયા જવાનું છે. આ ઓફર લેટર પર વિશ્વાસ રાખીને નિકિતાબેને બીજા રૂ. 4.30 લાખ ચૂકવી દીધા હતા. ત્યારબાદ એજન્ટોએ જ્યોર્જિયાના વિઝા અપાવવાનું કહીને ગલ્લાતલ્લા કર્યા હતા અને કોઈ યોગ્ય કાર્યવાહી કરી નહોતી. બંને ભાઈઓએ વિદેશમાં નોકરીની લાલચ આપીને નિકિતાબેન અને તેમની મિત્ર સિમરન પાસેથી કુલ રૂ. 10.60 લાખ પડાવી લીધા હતા. પોલીસને આશંકા છે કે આ એજન્ટ ભાઈઓની જાળમાં ફસાઈને અન્ય લોકોએ પણ પોતાના રૂપિયા ગુમાવ્યા હોઈ શકે છે, જે દિશામાં હાલ વધુ તપાસ ચાલી રહી છે.
