શિક્ષિકાના પતિને આચાર્યએ થપાટ મારી ધમકી આપી
અડધી સીએલ રજિસ્ટરમાં ચડાવવા મુદ્દે થયેલા ઝઘડામાં શાળાના આચાર્ય અને અન્ય શિક્ષિકા સામે ફરિયાદ નોંધાઈ
ભાવનગર: શહેરના આખલોલ જકાતનાકા વિસ્તારમાં આવેલી પ્રાથમિક શાળા નં.૫૩માં સીએલ રજિસ્ટરમાં ચડાવવા મુદ્દે બે શિક્ષિકાઓ વચ્ચે થયેલી બોલા ચાલી બાદ મામલો આચાર્ય પાસે પહોંચ્યો હતો. જ્યાં આચાર્યએ તેમની શાળામાં નોકરી કરતા શિક્ષક દંપતિને અપશબ્દો કહી ધમકી આપ્યાનો બનાવ બન્યો હતો. બનાવ અંગે બોરતળાવ પોલીસ મથકમાં શાળાના આચાર્ય અને અન્ય એક શિક્ષિકા સામે ફરિયાદ નોંધાઈ છે.
શહેરના શાસ્ત્રીનગર વિસ્તારમાં રહેતા અને આખલોલ જકાતનાકા મહાદેવનગર ખાતે આવેલી શ્રી પ્રમુખ સ્વામી મહારાજ પ્રાથમિક શાળા નં.૫૩માં મદદનીશ શિક્ષક તરીકે ફરજ બજાવતા પ્રિતીબેન દિલિપસિંહ ચૌહાણે બોરતળાવ પોલીસ મથકમાં શાળાના આચાર્ય પુનિત ઉપાધ્યાય અને તથા શાળામાં નોકરી કરતા હેતલબેન ભેડા વિરૂદ્ધ ફરિયાદ નોંધાવી હતી. જેમાં ગત રોજ બપોરે તેઓ નોકરીએ શાળામાં જઈ રજીસ્ટરમાં સહી કરતા હતા ત્યારે તેમની શાળામાં નોકરી કરતા હેતલબેન ભેડાએ તેમની પાસે આવી તેમને રજિસ્ટરમાં અડધી સીએલ રજા ઉધારવાની બાકી હોવાનું જણાવ્યું હતું, જે બાબતે તેઓ આચાર્ય સાથે વાત કરી લેશે તેમ જણાવતા હેતલબેને તેમને અપશબ્દો કહ્યાં હતા. જે બાદ હેતલબેને આચાર્યને ચડામણી કરતા આચાર્યએ મિટિંગ કરી બધા શિક્ષકોની વચ્ચે તેમને તથા શાળામાં તેમની સાથે નોકરી કરતા તેમના પતિને અપશબ્દો કહ્યાં હતા. જે બાદ બપોર પછી તેમના પતિ શાળાએ આવી તેઓ બન્ને આચાર્યના સમજાવવા જતાં ઉશ્કેરાઈને અપશબ્દો કહી તેમના પતિને ચાર-પાંચ ધોલના ઘા કરી જાનથી મારી નાખવાની ધમકી આપી હતી. આ અંગે બોરતળાવ પોલીસે ગુનો નોંધી આગળની કાર્યવાહી હાથ ધરી છે.
