શિક્ષણ જગતને લાંછન લગાડતી શર્મસાર ઘટના
ઠાસરાના ચિતલાવની પ્રાથમિક શાળામાં ફરજ બજાવતા શિક્ષકની ધરપકડ કરવા માટે ડાકોર પોલીસ દ્વારા તજવીજ
નડિયાદ: વડોદરાના સાવલી ખાતે અભ્યાસ કરતી વિદ્યાર્થિની સાથે દુષ્કર્મ આચર્યું હોવાના આક્ષેપ સાથે શિક્ષક શૈલેષ રાઠવા વિરુદ્ધ ડાકોર પોલીસે પોક્સો હેઠળ ગુનો દાખલ કર્યો છે. અગાઉ ચિતલાવ પ્રાથમિક શાળામાં અભ્યાસ દરમિયાન જ ખરાબ દાનત ધરાવતા શિક્ષક સામે ગ્રામજનોમાં પણ ભારે આક્રોશ જોવા મળી રહ્યો છે. હાલ પોલીસે આરોપીની ધરપકડ કરવા માટેના ચક્રો ગતિમાન કરી આગળની તપાસ હાથ ધરી છે.
ખેડાના ઠાસરા તાલુકાના ચિતલાવ ગામેથી માનવતા અને શિક્ષણ જગતને શર્મસાર કરતી ઘટના સામે આવી છે. ગામની જ પ્રાથમિક શાળામાં ફરજ બજાવતા શૈલેષ રાઠવા નામના શિક્ષકે ધોરણ ૯માં અભ્યાસ કરતી એક સગીર વિદ્યાર્થિની પર દુષ્કર્મ આચર્યું હોવાના આક્ષેપ સાથેની વિગતો બહાર આવતા પંથકમાં રોષ જોવા મળી રહ્યો છે. ઘટનાની વિગતોમાં થયેલા આક્ષેપો મુજબ, ભોગ બનનાર દીકરી અગાઉ ચિતલાવ પ્રાથમિક શાળામાં ધોરણ ૮ સુધી અભ્યાસ કરતી હતી. આ સમયગાળા દરમિયાન જ તે જ શાળામાં ફરજ બજાવતા શિક્ષક શૈલેષ રાઠવાની નજર આ સગીરા પર બગડી હતી. શિક્ષક તે સમયે પણ દીકરીને અવારનવાર હેરાન પરેશાન કરતો હતો અને તેના પ્રત્યે ખરાબ દાનત ધરાવતો હતો. જોકે તે સમયે ડરના કારણે દીકરીએ આ બાબતે કોઈને જાણ કરી ન હતી. ધોરણ ૮નો અભ્યાસ પૂર્ણ કર્યા બાદ સગીરા આગળ ભણવા માટે વડોદરા જિલ્લાના સાવલી ખાતે ગઈ હતી. સાવલી ગયા બાદ પણ આ શિક્ષકે તેનો પીછો છોડયો ન હતો. શૈલેષ રાઠવા સતત તેની પાછળ પડી ગયો હતો અને દીકરીને પોતાની જાળમાં ફસાવવા માટે પ્રયત્નો કરતો રહ્યો હતો. અડપલાંથી શરૂ થયેલો શિક્ષકનો બદઈરાદો અંતે દુષ્કર્મ સુધી પહોંચ્યો હતો. શિક્ષકે પોતાની મર્યાદાઓ નેવે મૂકીને દીકરી પર દુષ્કર્મ આચરતા મામલો ગંભીર બન્યો હતો. આ સમગ્ર કાળી કરતૂતોની જાણ જ્યારે દીકરીના પરિવારજનોને થઈ ત્યારે તેમના પગ નીચેથી જમીન સરકી ગઈ હતી. શિક્ષક દ્વારા કરવામાં આવેલા આ કૃત્યની ગંભીતાને સમજીને પરિવારે તાત્કાલિક કાયદાકીય લડત આપવાનો નિર્ણય કર્યો હતો. દીકરી સાથે ન્યાય મેળવવા માટે પરિવાર સાવલીથી સીધો પોલીસ મથકે પહોંચ્યો હતો અને શિક્ષક વિરુદ્ધ ફરિયાદ નોંધાવવા માટેની તજવીજ હાથ ધરી હતી.
આ મામલે ડાકોર પોલીસ મથકે શિક્ષક શૈલેષ રાઠવા વિરુદ્ધ વિધિવત્ રીતે ફરિયાદ દાખલ કરવામાં આવી છે. પોલીસે આ ઘટનામાં ગંભીરતા દાખવીને આરોપી શિક્ષક સામે દુષ્કર્મની કલમો તેમજ પોક્સો એક્ટની વિવિધ કલમો હેઠળ ગુનો નોંધીને તપાસનો ધમધમાટ શરૂ કર્યોે છે. પોલીસ દ્વારા ભોગ બનનાર સગીરાનું મેડિકલ પરીક્ષણ કરાવવાની સાથે સાથે નિવેદન લેવાની કાર્યવાહી પણ પૂર્ણ કરવામાં આવી છે. ડાકોર પોલીસે આરોપી શિક્ષકની ધરપકડ કરવા માટેના ચક્રો ગતિમાન કર્યા છે અને વધુ પુરાવાઓ એકત્ર કરવાની કામગીરી હાથ ધરી છે.
