PM Modi Sikkim Visit 2026: PM નરેન્દ્ર મોદી અત્યારે સિક્કિમના બે દિવસીય પ્રવાસે છે. આજે મંગળવારે સિક્કિમના 50મા સ્થાપના દિવસના સમાપન સમારોહમાં PM મોદી વિશેષ હાજરી આપશે. જોકે, આ કાર્યક્રમ પહેલાં PMએ સિક્કિમની સવારનો આનંદ માણીને સૌનું ધ્યાન ખેંચ્યું હતું.
સિક્કિમના નાનકડા દોસ્તો સાથે ફૂટબોલનો આનંદ
રાજધાની ગંગટોકમાં સવારના સમયે PM મોદીએ સ્થાનિક યુવાનો અને બાળકો સાથે ફૂટબોલ રમતા જોવા મળ્યા હતા. સોશિયલ મીડિયા પર આ તસવીરો શેર કરતા તેમણે લખ્યું કે, ગંગટોકની એક સુંદર સવાર, સિક્કિમમાં મારા નાનકડા દોસ્તો સાથે ફૂટબોલ રમવાની મજા જ કંઈક અલગ છે! PMએ આ સેશનને અત્યંત યાદગાર અને જોરદાર ગણાવ્યું હતું.
બંગાળ ચૂંટણી અને ફૂટબોલનું કનેક્શન
રાજકીય વિશ્લેષકોનું માનવું છે કે PM મોદીનું આ પગલું પશ્ચિમ બંગાળ વિધાનસભા ચૂંટણીના અંતિમ તબક્કાને સાધવાની એક મોટી રણનીતિ છે. પશ્ચિમ બંગાળમાં ફૂટબોલ માત્ર રમત નથી, પણ એક લાગણી છે. કોલકાતાને ભારતીય ‘ફૂટબોલનું મક્કા’ માનવામાં આવે છે. બંગાળમાં ચૂંટણી પ્રચારનો શોર થમ્યા બાદ PM મોદીનું મેદાનમાં ઉતરવું એ બંગાળના ફૂટબોલ પ્રેમીઓને એક મોટો સાંસ્કૃતિક સંકેત માનવામાં આવે છે.
ગઈકાલે ગંગટોકમાં ભવ્ય રોડ શો
PM સોમવારે સાંજે ગંગટોક પહોંચ્યા હતા, જ્યાં તેમનું ઉષ્માભર્યું સ્વાગત કરવામાં આવ્યું હતું. હેલીપેડથી લોકભવન સુધી યોજાયેલા રોડ શોમાં હજારોની સંખ્યામાં લોકો ઉમટી પડ્યા હતા. લોકોની ભીડ અને ઉત્સાહ જોઈને PMએ પણ અભિવાદન ઝીલ્યું હતું.
આ પણ વાંચો: LIVE : ગુજરાત સ્થાનિક સ્વરાજની ચૂંટણીના આજે પરિણામ, જાણો તમામ મનપા-નપાની સ્થિતિ
આજનો દિવસ કેવો રહેશે?
આજે PM અનેક મહત્વના કાર્યક્રમોમાં ભાગ લેવાના છે. PM મોદી ગંગટોકમાં સ્વર્ણ જયંતિ મૈત્રી મંજરી પાર્કનું નિરીક્ષણ કરશે, જે રાજ્યના પુષ્પ વારસાને પ્રદર્શિત કરવા માટે વિકસાવવામાં આવ્યું છે. પાલજોર સ્ટેડિયમ ખાતે સિક્કિમની સ્થાપનાના 50 વર્ષ પૂર્ણ થવાના અવસરે આયોજિત ભવ્ય સમાપન કાર્યક્રમમાં તેઓ મુખ્ય અતિથિ તરીકે હાજર રહેશે. આ પ્રસંગે PM સિક્કિમ માટે રૂ. 4,000 કરોડથી વધુની વિવિધ વિકાસ યોજનાઓનું અનાવરણ પણ કરશે.
ગયા વર્ષની અધૂરી મુલાકાત આજે પૂર્ણ થશે
સિક્કિમના 50 વર્ષ ગયા વર્ષે પૂર્ણ થયા હતા અને ઉદ્ઘાટન સમારોહમાં પણ PM મોદી આવવાના હતા. જોકે, તે સમયે ખરાબ હવામાનને કારણે તેઓ ગંગટોક પહોંચી શક્યા નહોતા અને સિલિગુડીથી વીડિયો કોન્ફરન્સ દ્વારા સંબોધન કર્યું હતું. આ વર્ષે PM પોતે હાજર રહીને સિક્કિમના આ ઐતિહાસિક પર્વની ઉજવણીને ચાર ચાંદ લગાવી રહ્યા છે.
