– બિલિંગ કરનારા સિહોરના શખ્સને જ્યુડિશિયલ કસ્ટડીમાં મોકલાયો
– સિહોરમાં રૂ. 200 કરોડનું બોગસ બિલિંગ કૌભાંડ ઉજાગર થયું
ભાવનગર : સેન્ટ્રલ જીએસટી વિભાગે સિહોરમાં રૂ.૨૦૦ કરોડના બોગસ બિલિંગના કૌભાંડને ઉજાગર કર્યું છે. બિલિંગ કરનારા સિહોરના શખ્સને સીજીએસટી વિભાગની ટીમે ગતરોજ રાત્રે ઝડપી લઈ પુછપરછ બાદ આજે કોર્ટમાં રજૂ કરતા કોર્ટે આરોપીને ૧૪ દિવસની જ્યુડિશિયલ કસ્ટડીમાં મોકલવા હુકમ કર્યો હતો.
સેન્ટ્રલ જીએસટી વિભાગની પુછપરછ બાદ તપાસના તાર અન્ય પેઢીઓ સુધી પણ લંબાશે, ઈડી અને આઈટીને પણ જાણ કરાશે
બોગસ બિલિંગમાં પંકાયેલા ભાવનગરમાંથી સેન્ટ્રલ જીએસટી વિભાગે વધુ એક બોગસ બિલિંગ કૌભાંડ ઉજાગર કર્યું છે. આ મામલે સૂત્રો પાસેથી મળતી વિગતો અનુસાર સેન્ટ્રલ જીએસટી ભાવનગર કમિશ્નરેટની કચેરીને મળેલા ઈન્ટેલના આધારે સંદીપરાજસિંગ ચૌહાણ (ઉ.વ.૩૫, રહે.સિહોર) નામના શખ્સને ગતરોજ રાત્રિના ૮ કલાકના અરસામાં ઝડપી લેવામાં આવ્યો હતો. વિભાગની તપાસમાં અત્યાર સુધીમાં આ શખ્સે રૂદ્રાંશ ઈમ્પેક્સ પ્રા.લી. પેઢીના નામે કુલ રૂ.૨૦૦ કરોડનું બોગસ બિંલિંગ કરી કૌભાંડ આચર્યું છે. આગામી તપાસમાં આ આંકડો વધે તેવી શક્યતા સેવાઈ રહી છે. સીજીએસટી વિભાગની પુછપરછમાં શખ્સે સળિયા અને સ્ક્રેપના વ્યવસાયીઓ સાથે કરેલા વ્યવહાર અંગે પણ ખુલાસો કર્યો છે ત્યારે આ બોગસ બિલિંગ કૌભાંડની તપાસના તાર આગામી દિવસોમાં અન્ય પેઢીઓ સુધી લંબાશે. પુછપરછ બાદ સેન્ટ્રલ જીએસટી વિભાગે આરોપીને આજે કોર્ટમાં રજૂ કરતા કોર્ટે આરોપીને ૧૪ દિવસની જ્યુડિશિયલ કસ્ટડીમાં મોકલવા હુકમ કર્યો હતો. બીજી તરફ આગામી દિવસોમાં આ મામલે આવકવેરા વિભાગ અને ઈડીને પણ જાણ કરવામાં આવશે.
