– અમદાવાદ- વડોદરા એક્સપ્રેસ હાઈવે પર
– આડસ વગર ટાયર બદલતા હતા સ્ટેરિંગ ગાડીના ડ્રાઈવરના પેટમાં ઉતરી ગયું
નડિયાદ : અમદાવાદ વડોદરા એક્સપ્રેસ હાઈવે પર ફુલ સ્પીડની લાઈન ઉપર આડસ મુક્યા વગર ટાયર બદલવા ઉભી રહેલી ટ્રક પાછળ ગાડી ઘુસી ગઈ હતી. જેથી ગંભીર રીતે ઈજા પામેલ ગાડીના ચાલકનું ઘટના સ્થળે જ મોત નિપજ્યું હતું. આ બનાવ અંગે મહેમદાવાદ પોલીસે ગુનો દાખલ કર્યો હતો.
વડોદરા જિલ્લામાં ડભોઇમાં રહેતા અયુબ શા દિવાન ગાડીમાં રાજપીપળાથી કેળા ભરી અમદાવાદ સોનીની ચાલી ગયો હતો. ત્યાંથી આજે વહેલી સવારે ગાડી લઇ પરત ડભોઇ જવા અમદાવાદ વડોદરા એક્સપ્રેસ હાઈવે પરથી પસાર થતો હતો. દરમિયાન વહેલી સવારે પાંચ વાગ્યાના સુમારે સૂંઢાવણસોલ બ્રિજ નજીક ડિવાઇડરની પ્રથમ ફુલ સ્પીડ લાઈન ઉપર એક ટ્રક ચાલક ટ્રકના જમણી બાજુના લિફ્ટિંગ ટાયર બદલવા ટ્રક ઉભી રાખી હતી. ટ્રકની સાઈડ લાઈટ ચાલુ ન હતી કે આડસ મૂકી ન હતી. જેથી પુરઝડપે આવી રહેલી ગાડી ટ્રક પાછળ અથડાતા ગાડીના ચાલક અયુબશા દિલાવરશા દિવાન (ઉંમર વર્ષ ૩૨)નું પેટમાં સ્ટેરીંગ ઘુસી જતા ગાડીમાં જ મોત નિપજ્યું હતું.
આ બનાવની જાણ થતા હિરેનભાઈ જયંતીભાઈ પટેલ (રહે. ડભોઇ) એ મહેમદાવાદ પોલીસ સ્ટેશનમાં ફરિયાદ નોંધાવતા પોલીસે ટ્રક ચાલક સામે ગુનો નોધી કાયદેસર કાર્યવાહી હાથ ધરી હતી.
