પ્રવેશ પ્રક્રિયામાં મોટાપાયે ગેરરીતિ આચરાઈ
રાજસ્થાન સરકારને પણ સત્તા વગર પર્સેન્ટાઇલ ઘટાડવા બદલ 10 લાખનો દંડ ફટકાર્યો
જયપુર: સુપ્રીમ કોર્ટે એક મહત્ત્વના ચુકાદામાં રાજસ્થાનની ૧૦ ખાનગી ડેન્ટલ કોલેજોમાં બધાને ૧૦-૧૦ કરોડ રૂપિયાનો દંડ ફટકાર્યો છે. સુપ્રીમે જણાવ્યું હતું કે આ કોલેજો કાયદાનો અને નિયમોનો રીતસરનો ધજાગરા કર્યો છે અને તે આ બદલ દંડને પાત્ર છે.
આ કેસમાં તબીબી શિક્ષણના ધારાધોરણોને અવગણવામાં આવ્યા હોવાનું કહેતા ન્યાયાધીશ વિજય બિશ્નોઈ અને જે કે મહેશ્વરીની બેન્ચે આ કોલેજો અને રાજ્ય સરકારના પગલાંને અમાન્ય ઠેરવ્યા હતા. કોર્ટે રાજ્ય સરકારને પણ રાજસ્થાન સ્ટેટ લીગલ સર્વિસિઝ ઓથોરિટી (આરએસએલએસએ) સમક્ષ દસ લાખ રુપિયા જમા કરાવવા આદેશ આપ્યો હતો.
૨૦૧૬-૧૭ની શૈક્ષણિક સીઝન દરમિયાન બેચલર ઓફ ડેન્ટલ સર્જરીમાં પ્રવેશ પ્રક્રિયા દરમિયાન નિયમોનું પાલન કરાવવામાં નિષ્ફળ જવા બદલ આ આદેશ આપ્યો હતો. કોર્ટનો આ આદેશ પ્રવેશ પ્રક્રિયા દરમિયાન મોટાપાયા પર જોવા મળેલી ગેરરીતિના કારણે આવ્યો છે. રાજસ્થાન સરકારે કોઈપણ પ્રકારની સત્તા વગર નીટ (નેશનલ એલિજિબિલિટી કમ એન્ટ્રન્સ ટેસ્ટ)ના પર્સેન્ટાઇલ ૧૦ ટકા સુધી અને બીડીએસના વિદ્યાર્થીઓ માટે બીજા પાંચ ટકા સુધી ઘટાડયા હતા.
