Surat Corporation : સુરત મહાનગરપાલિકામાં છેલ્લા ઘણા વખતથી યુનિયન કામ કરે છે પરંતુ અનેક યુનિયનોને શ્રમ વિભાગમાં રજીસ્ટ્રેશન જ નથી કરાવ્યું. આ ઉપરાંત મોટાભાગના યુનિયન નું રજીસ્ટ્રેશન મહારાષ્ટ્ર, અમદાવાદ કે ગાંધીનગર થયું છે. રજીસ્ટ્રેશન અન્ય શહેરમાં અને કાર્યક્ષેત્ર સુરત કેમ? તે પ્રશ્ન ઉભો થયો છે. આવા અનેક કિસ્સા બહાર આવવા સાથે કેટલીક ગંભીર ફરિયાદ હોવાથી પાલિકાના ડેપ્યુટી કમિશ્નરે એક સાથે 25 જેટલા યુનિયનને માહિતી રજુ કરવા માટે નોટીસ આપવાનો હિંમતભર્યા નિર્ણય કરતા ખળભળાટ મચી ગયો છે.
સુરત પાલિકામાં કર્મચારીઓને નડતા પ્રશ્નો માટે કેટલાક યુનિયન દ્વારા લડત આપવા સાથે સારી કામગીરી કરવામાં આવે છે. પરંતુ કેટલાક યુનિયનના નેતાઓ દ્વારા પાલિકાના અધિકારીઓને દબાવવાનો પ્રયાસ કરાતો હોવાના આક્ષેપ થઈ રહ્યો છે. ઘણી વખત કેટલાક લીડરો પોતાની વાત મનાવવા આક્રમક રજુઆત દેખાવ સાથે પોતાના કામ કરાવી લેતા હોય છે તેવી પણ ફરિયાદ ઉઠી છે. આવી સંખ્યાબંધ ફરિયાદ બાદ સરકાર માંથી આવેલા ડેપ્યુટી કમિશનર નિધિ શિવાય દ્વારા પાલિકામાં ઓફિસ ધરાવતા અને અલગ અલગ કુલ 25 યુનિયનને પુરાવા રજૂ કરવા માટે નોટિસ મોકલવામાં આવી છે.
25 જેટલી નોટિસ આપવામાં આવી છે તેમાં મોટાભાગના યુનિયનના રજીસ્ટ્રેશન સુરત બહાર એટલે કે મહારાષ્ટ્ર, અમદાવાદ કે ગાંધીનગર થયાં છે. સુરત બહાર રજીસ્ટ્રેશન થયા છે તો કાર્યક્ષેત્ર સુરત કઈ રીતે હોઈ શકે તેવો પ્રશ્ન સાથેની નોટિસ આપવા સાથે યુનિયનની માહિતી આપવા માટે સાત દિવસની સમય મર્યાદા આપવામા આવી છે. આ નોટિસના કારણે અત્યાર સુધી યુનિયનના કારણે પાલિકા પર હાવી થતા યુનિયનમાં ખળભળાટ મચી ગયો છે. જો આગામી સાત દિવસમાં યુનિયનો દ્વારા યોગ્ય પુરાવા રજૂ નહીં કરાય તો કાયદેસરના પગલાં પણ લેવા માટે કવાયત શરૂ થઈ ગઈ છે.
આ યુનિયનને આપવામાં આવી છે નોટિસ
સુરત સુધરાઈ કામદાર (સ્ટાફ) મંડળ, સુરત મહાનગરપાલિકા સફાઈ કામદાર મંડળ, અખિલ ભારતીય સફાઇ મજદૂર સંઘ, સુરત મહાનગર પાલિકા સેવક મંડળ, અખિલ ભારતીય સફાઈ કર્મચારી કલ્યાણ સંઘ, રાષ્ટ્રીય સફાઇ મજદૂર મહાસંઘ, અખિલ ભારતીય સફાઇ મજદૂર કોંગ્રેસ, સુરત મહાનગર પાલિકા સ્ટાફ યુનિયન, પરપ્રાંતીય કામદાર સેના, સુરત મહાનગરપાલિકા કર્મચારી મંડળ, દક્ષિણ ગુજરાત ઔધોગિક જનરલ મજદૂર સંઘ, ભારતીય સફાઈ કામદાર યુનિયન, સુરત મહાનગર પાલિકા ટેક્નિકલ સ્ટાફ મંડળ, જય ગુજરાત કામદાર સંઘ, નવયુવાન કર્મચારી સેવા સંઘ, જય બુદ્ધ કર્મચારી યુનિયન, રાષ્ટ્રીય સફાઇ મજદૂર સંઘ, સુરત મહાનગર પાલિકા નોન ટેક્નિકલ સ્ટાફ યુનિયન, ગુજરાત સફાઈ કામદાર એકતા યુનિયન, અખિલ ભારતીય સફાઈ કામદાર સંગઠન, સુરત મહાનગર પાલિકા મજદૂર સંઘ, ગુજરાત પ્રદેશ મહાનગર પાલિકા કર્મચારી કોંગ્રેસ, ડો.બાબાસાહેબ આંબેડકર સફાઈ કામદાર યુનિયન, સરદાર વલ્લભભાઈ પટેલ વર્ગ 4 કર્મચારી યુનિયનનો સમાવેશ થાય છે.
20 વર્ષથી રજીસ્ટ્રેશન નથી તેવા યુનિયનને પાલિકાની ઓફિસ ખાલી કરવા તાકીદ
સુરત પાલિકામાં કામ કરતા વિવિધ યુનિયનોને ઓફિસની ફાળવણી કરવામા આવી છે. કેટલાક યુનિયને તો પાલિકા માન્ય યુનિયન છે તેવું પણ લખી દીધું છે તેથી પાલિકાએ કઈ માન્યતા આપી છે તેનો ખુલાસો કરવા નોટિસમાં જણાવ્યું છે. તો બીજી તરફ છેલ્લા 20 વર્ષથી શ્રમ વિભાગમાં રજીસ્ટ્રેશન નથી તેવા યુનિયનને ઓફિસ ખાલી કરવા માટે નોટીસ આપી છે.
સુરત પાલિકા દ્વારા 20 વર્ષ પહેલા લાલ વાવટા યુનિયનની માન્યતા રદ્દ કરવામાં આવી હતી. આ ઉપરાંત છેલ્લા 20 વર્ષથી આ યુનિયનનું રજીસ્ટ્રેશન પણ શ્રમ વિભાગમાં કરવામાં આવ્યું નથી તેથી આ લાલ વાવટા યુનિયનને સાત દિવસમાં ઓફિસ ખાલી કરવા નોટિસ આપવામાં આવી છે. આ ઉપરાંત કેટલાક યુનિયનની ઓફિસ છે તેની ફાળવણી કરવામાં આવી તેનો પુરાવા પણ માંગવામાં આવ્યા છે.
પાલિકાના ઈતિહાસમાં પહેલીવાર યુનિયનો પાસે પુરાવા મંગાયા
સુરત પાલિકાના કેટલાક યુનિયનના નેતાઓ અને હોદ્દેદારો પાલિકાની કામગીરી કરતા નથી અને યુનિયન ગીરી કરી રહ્યા હોવાની ફરિયાદ છે. કેટલાક કિસ્સામાં પાલિકા તંત્રને બાનમાં લેતા હોવાના પણ આક્ષેપ કરવામાં આવ્યા છે અનેક ઘટના બાદ પાલિકાના ડેપ્યુટી કમિશનર નિધી શિવાયે પાલિકાના ઈતિહાસમાં પહેલી વાર યુનિયનો પાસે કાયદેસરતાના પુરાવા માંગવાનો નિર્ણય કર્યો છે.
સુરત પાલિકાના ઇતિહાસમાં પ્રથમ વખત ડેપ્યુટી કમિ. નિધિ સિવાચે બોલ્ડ નિર્ણય કરી તમામ યુનિયન/મંડળોના પ્રમુખ/મહામંત્રીઓને પત્ર પાઠવી યુનિયનની કાયદેસરતાïના દસ્તાવેજા રજૂ કરવા નોટિïસ આપવામા આવી છે. યુનિયનના હોદ્દેદારોને યુનિયનની કાયદેસરતા રજુ કરવા માટે નોટિસ આપી છે. આ ઉપરાંત મોટાભાગના યુનિયનોને છેલ્લા ત્રણ વર્ષના ઇન્કમટેક્ષ રીટર્ન પણ રજૂ કરવા તાકીદ કરવામાં આવી છે.
