Surat Municipal Corporation: સુરત મહાનગરપાલિકામાં ભાજપને મળેલી રેકોર્ડબ્રેક જીત બાદ હવે શિક્ષણ સમિતિની રચનાને લઈને રાજકીય ગરમાવો ચરમસીમાએ પહોંચ્યો છે. આ વખતે સૌથી મહત્વની બાબત એ બની છે કે શિક્ષણ સમિતિના અધ્યક્ષ-ઉપાધ્યક્ષ જ નહીં, પરંતુ 12 સભ્યોના નામ પણ શહેર ભાજપ નહીં, સીધી પ્રદેશ નેતાગીરી નક્કી કરશે. જેના કારણે શહેર ભાજપની ભૂમિકા માત્ર દાવેદારોના બાયોડેટા એકત્ર કરવા સુધી જ મર્યાદિત રહી હોવાનું માનવામાં આવી રહ્યું છે. બીજી તરફ, સમિતિમાં સ્થાન મેળવવા માટે ભાજપમાં ભારે પડાપડી શરૂ થઈ ગઈ છે. માત્ર 12 બેઠકો માટે 240થી વધુ દાવેદારો મેદાનમાં ઉતરતાં સંગઠનમાં લોબિંગ, ગોઠવણો અને રાજકીય દોડધામ તેજ બની ગઈ છે.
માત્ર 12 બેઠકો માટે 240થી વધુ દાવેદારો
સુરત પાલિકામાં ભાજપને મળેલી રેકોર્ડબ્રેક 115 બેઠકો બાદ હવે શિક્ષણ સમિતિ સંપૂર્ણપણે ભાજપના કબજામાં જવાની છે. વિપક્ષનો એક પણ સભ્ય સમિતિમાં નહીં હોય તેવી સ્થિતિ વચ્ચે ભાજપમાં સભ્ય બનવા માટે ભારે દોડધામ શરૂ થઈ ગઈ છે. માત્ર 12 બેઠકો માટે 240થી વધુ દાવેદારો મેદાનમાં ઉતરતાં ભાજપ સંગઠનમાં જોરદાર લોબિંગ અને રાજકીય ગતિવિધિઓ આક્રમક બની છે.
એક હજાર કરોડ કરતાં વધુ બજેટ
એક હજાર કરોડ કરતાં વધુ બજેટ ધરાવતી શિક્ષણ સમિતિને ખૂબ જ મહત્વપૂર્ણ સમિતિ માનવામાં આવે છે. પાલિકા સંચાલિત શાળાઓ, શિક્ષણનું બજેટ, ભરતી, નવી શાળાઓ અને શૈક્ષણિક નીતિ સંબંધિત અનેક મહત્વના નિર્ણયો આ સમિતિ દ્વારા લેવાતા હોવાથી, તેમાં સ્થાન મેળવવા કોર્પોરેટરો અને કાર્યકરોમાં ભારે ઉત્સુકતા જોવા મળી રહી છે. સુરત પાલિકાની 120 બેઠકોમાંથી ભાજપ પાસે 115 સભ્યો હોવાથી શિક્ષણ સમિતિમાં વિપક્ષનો એક પણ સભ્ય આવશે નહીં તે લગભગ નક્કી છે. આવી સ્થિતિમાં હવે ભાજપની અંદર અંદરની સ્પર્ધા જ સૌથી વધુ રસપ્રદ બની છે.
શહેર ભાજપની ભૂમિકા મર્યાદિત
સુરત શિક્ષણ સમિતિમાં સભ્ય બનવા માટે ભાજપમાં ભારે સ્પર્ધા જોવા મળી રહી છે. 12 સભ્યો માટે 240થી વધુ લોકોએ દાવેદારી કરી છે અને પોતાના બાયોડેટા શહેર ભાજપના નેતાઓને સોંપી દીધા છે. જો કે, તાજેતરમાં મેયર, ડેપ્યુટી મેયર અને અન્ય પદાધિકારીઓ માટે આવેલી નિરીક્ષક ટીમે શિક્ષણ સમિતિના દાવેદારો અંગે પણ સેન્સ પ્રક્રિયા પૂર્ણ કરી લીધી હતી. જેના કારણે હવે સમિતિના સભ્યો અને પદાધિકારીઓની પસંદગી સીધી પ્રદેશ કક્ષાએથી જ જાહેર થશે તે નક્કી માનવામાં આવી રહ્યું છે. આવી સ્થિતિમાં શિક્ષણ સમિતિના અધ્યક્ષ-ઉપાધ્યક્ષ તો ઠીક, પણ 12 સભ્યોના નામ પણ શહેર ભાજપ નહીં પરંતુ પ્રદેશ નેતાગીરી જ નક્કી કરશે તે સ્પષ્ટ થઈ ગયું છે. આથી શહેર ભાજપની ભૂમિકા માત્ર દાવેદારોના બાયોડેટા એકત્ર કરવા સુધી જ મર્યાદિત રહી હોવાની ચર્ચા ચાલી રહી છે.
