મુંબઈ : મુંબઈ ઝવેરી બજારમાં આજે સોના-ચાંદીમાં તેજી આગળ વધી હતી. ચાંદીમાં નવા ઉંચા ભાવ દેખાયા હતા. વિશ્વ બજારના સમાચાર કિંમતી ધાતુઓમાં આગેકૂચ બતાવી રહ્યા હતા તથા તેના પગલે ઘરઆંગણે ઈમ્પોર્ટ કોસ્ટ વધતાં દેશના ઝવેરી બજારોમાં તેજીનું તોફાન આજે પણ ચાલુ રહ્યું હતું. દરમિયાન, વિશ્વ બજારમાં સોનાના ભાવ ઔંશના ૪૩૧૭થી ૪૩૧૮ વાળા વધી ઉંચામાં ભાવ ૪૩૪૩ થઈ ૪૩૨૩થી ૪૩૨૪ ડોલર રહ્યાના નિર્દેશો મળ્યા હતા.
દરમિયાન, ઘરઆંગણે આજે અમદાવાદ બજારમાં ચાંદીના ભાવ કિલોના ઝડપી રૂ.૫૦૦૦ ઉછળી રૂ.૧૯૮૦૦૦થી નવી ઉંચી રેકોર્ડ સપાટીએ પહોંચ્યા હતા. દરમિયાન, અમદાવાદ સોનાના ભાવપ વધ્યા મથાળે અથડાતા રહ્યા હતા. અમદાવાદ સોનાના ભાવ ૧૦ ગ્રામના ૯૯૫ના રૂ.૧૩૬૨૦૦ તથા ૯૯૯ના રૂ.૧૩૬૫૦૦ બોલાતા હતા.
દરમિયાન, વિશ્વ બજારમાં ચાંદીના ભાવ ઔંશના ૬૫.૯૫થી ૬૫.૯૬ વાળા વધી ઉંચામાં ભાવ ૬૬.૬૨ની નવી ટોચે પહોંચી ત્યારબાદ ભાવ ૬૬.૧૨ થી ૬૬.૧૩ ડોલર રહ્યા હતા. અમદાવાદ બજારમાં ચાંદીના ભાવ કિલોદીઠ રૂ.૫૦૦૦ વધી રૂ.૧૯૮૦૦૦ બોલાયા હતા.
મુંબઈ બુલીયન બજારમાં આજે જીએસટી વગર સોનાના ભાવ ૯૯૫ના રૂ.૧૩૧૭૮૭ વાળા રૂ.૧૩૧૯૪૪ રહ્યા હતા જ્યારે ૯૯૯ના ભાવ રૂ.૧૩૨૩૧૭ વાળા રૂ.૧૩૨૪૭૪ રહ્યા હતા. મુંબઈ ચાંદીના ભાવ જીએસટી વગર રૂ.૧૯૯૬૪૧ વાળા રૂ.૨૦૧૨૫૦ થઈ છેલ્લે બંધ ભાવ રૂ.૨૦૧૧૨૦ના મથાળે બંધ રહ્યા હતા. દરમિયાન, મુંબઈ સોના-ચાંદીમાં જીએસટી સાથેના ભાવ આ ભાવથી ૩ ટકા ઉંચા રહ્યા હતા.
ભારત સરકારે આયાતકારો માટે ડોલરના કસ્ટમ એક્સચેન્જના દર રૂ.૯૧.૩૦થી ઘટાડી રૂ.૯૧.૨૫ કર્યાના નિર્દેશો હતા. આ નવા ભાવ ૧૯મી ડિસેમ્બરથી અમલમાં આવનાર છે. આના પગલે દેશમાં ઈમ્પોર્ટ થતા સોના-ચાંદીની ઈફેકટીવ ઈમ્પોર્ટ ડયુટીમાં ધીમો ઘટાડો થવાની ઘમતરી ઝવેરી બજારના જાણકારો જણાવી રહ્યા હતા.
દરમિયાન, વિશ્વ બજારમાં પ્લેટીનમના ભાવ ઉંચામાં ઔંશદીઠ ૧૯૮૧થી ૧૯૮૨ થઈ ૧૯૨૧થી ૧૯૨૨ ડોલર રહ્યા હતા જ્યારે પેલેડીયમના ભાવ ઉંચામાં ૧૭૧૦ થઈ ૧૬૮૬ થી ૧૬૮૭ ડોલર રહ્યા હતા. વૈશ્વિક કોપરના ભાવ આજે ૦.૩૬ ટકા પ્લસમાં રહ્યા હતા.
દરમિયાન વિશ્વ બજારમાં આજે ક્રૂડ તેલના ભાવ વધ્યા મથાળે ફરી નરમ રહ્યા હતા. બ્રેન્ટ ક્રૂડના ભાવ બેરલના ઉંચામાં ૬૦.૬૭ તથા નીચામાં ૫૯.૫૪ થઈ ૫૯.૭૪ ડોલર રહ્યા હતા. યુએસ ક્રૂડના ભાવ ઉંચામાં ૫૭.૦૩ તથા નીચામાં ૫૫.૮૮ થઈ ૫૬.૦૬ ડોલર રહ્યા હતા.
