મુંબઈ : મુંબઈ ઝવેરી બજારમાં આજે સોના-ચાંદીના ભાવમાં તેજીને બ્રેક વાગતાં ભાવ પ્રત્યાઘાતી ઝડપી તૂટી ગયા હતા. વિશ્વ બજારના સમાચાર ઉંચા મથાળેથી ભાવમાં કડાકો બતાવી રહ્યા હતા. વિશ્વ બજાર તૂટતાં ઘરઆંગણે આમ્પોર્ટ કોસ્ટ નીચી ઉતરી હતી અને તેના પગલે દેશના ઝવેરી બજારોમાં ભાવ આજે દબાણ હેઠળ જોવા મળ્યા હતા.
અમદાવાદ ઝવેરી બજારમાં આજે ચાંદીના ભાવ કિલોદીઠ રૂ.૩૦૦૦ તૂટયા હતા જ્યારે અમદાવાદ સોનાના ભાવ ૧૦ ગ્રામના રૂ.૧૫૦૦ ગબડયા હતા. વિશ્વ બજારમાં સોનાના ભાવ ઔંશના ૪૨૩૬થી ૪૨૩૭ વાળા આજે લગબડી નીચામાં ભાવ ૪૧૪૨ થઈ ૪૧૫૫થી ૪૧૫૬ ડોલર રહ્યાના સમાચાર મળ્યા હતા.
સોના પાછળ વૈશ્વિક ચાંદીના ભાવ પણ ઔંશના વૈશ્વિક ચાંદીના ભાવ ઔંશના ૫૩.૯૭થી ૫૩.૯૮ વાળા ગબડી નીચામાં ભાવ ૫૨.૧૮ થઈ ૫૨.૩૭થી ૫૨.૩૮ ડોલર રહ્યા હતા. વિશ્વ બજારમાં પ્લેટીનમના ભાવ ઔંશના ૧૬૨૦થી ૧૬૨૧ વાળા ઘટી નીચામાં ભાવ ૧૫૫૬ થઈ ૧૫૬૩થી ૧૫૬૪ ડોલર રહ્યા હતા.
વૈશ્વિક પેલેડીયમના ભાવ ઔંશના ૧૪૮૫થી ૧૪૮૬ વાળા નીચામાં ભાવ ૧૪૦૫ થઈ ૧૪૧૪થી ૧૪૧૫ ડોલર રહ્યા હતા. વૈશ્વિક કોપરના ભાવ આજે ૦.૯૧ ટકા માઈનસમાં રહ્યા હતા. અમેરિકામાં શટડાઉન પૂરું થતાં તથા વૈશ્વિક ડોલર ઈન્ડેક્સ વધતાં વિશ્વ બજારમાં આજે સોનામાં ઉંચા મથાળે ફંડોનું સેલીંગ વધ્યાની ચર્ચા વિશ્વ બજારમાં સંભળાઈ હતી.
દરમિયાન, મુંબઈ બુલિયન બજારમાં આજે સોનાના ભાવ જીએસટી વગર ૯૯૫ના રૂ.૧૨૬૦૪૭ વાળા રૂ.૧૨૪૨૯૪ રહ્યા હતા જ્યારે ૯૯૯ના ભાવ રૂ.૧૨૬૫૫૪ વાળા રૂ.૧૨૪૭૯૪ રહ્યા હતા. મુંબઈ ચાંદીના ભાવ જીએસટી વગર રૂ.૧૬૨૭૩૦ વાળા રૂ.૧૫૯૩૬૭ રહ્યા હતા. મુંબઈ સોના-ચાંદીના જીએસટી સાથેના ભાવ આ ભાવથી ૩ ટકા ઉંચા રહ્યા હતા. ચાંદીના ભાવ ગુરૂવારે રૂ.૬૦૦૦ ઉછળ્યા પછી શુક્રવારે રૂ.૩૦૦૦ તૂટી જતાં બે દિવસમાં ભાવમાં મોટી ઉછળકુદ જોવા મળતાં બજારના ખેલાડીઓ સ્તબ્ધ બની ગયા હતા.
દરમિયાન, વિશ્વ બજારમાં ક્રૂડતેલના ભાવ આજે ઝડપી ઉંચકાયા હતા. બ્રેન્ટ ક્રૂડના ભાવ બેરલના ઉંચામાં ૬૪.૮૭ થઈ ૬૩.૮૩ ડોલર રહ્યા હતા. જ્યારે યુએસ ક્રૂડના ભાવ ઉંચામાં ૬૦.૬૫ થઈ ૫૯.૫૩ ડોલર રહ્યા હતા. રશિયાના ઓઈલ મથકો પર યુક્રેનના હુમલાઓ વધતાં તથા અમેરિકામાં શટડાઉન પૂરો થતાં માગ વધવાની આશા વધતાં ક્રૂડતેલના વૈશ્વિક ભાવમાં મજબુતાઈ દેખાઈ હોવાનું બજારના જાણકારો જણાવી રહ્યા હતા.
