અમદાવાદ,શનિવાર
સ્ટેટ સાયબર ક્રાઇમે ઓનલાઇન છેતરપિંડીનો ભોગ બનેલા લોકોને રૂપિયા ૫.૫૧ કરોડની રકમ પરત કરવાની સાથે સમગ્ર દેશમાંથી રૂપિયા ૮૦૪ કરોડ રૂપિયાના કૌભાંડનો પર્દાફાશ કર્યો છે. વિયેતનામ અને કમ્બોડિયાથી ઓપરેટ થતી ગેંગના સંચાલકોએ છેતરપિંડી કરવા કોલ અને વિડીયો કોલ કરવા માટે ૧૫૫૦થી વધારે સીમ કાર્ડનો ઉપયોગ કરીને કરોડો રૂપિયા ખંખેર્યા હતા. સીઆઇડી ક્રાઇમના અધિકારીઓએ ૬૦૦થી વધુ બેંક એકાઉન્ટ, ૪૫૦ જેટલા સીમ કાર્ડ સાથે સુરતથી ૧૦ આરોપીઓની ધરપકડ કરી હતી.
સાયબર ક્રાઇમ આચરીને ઓનલાઇન છેતરપિંડીના કેસમાં સીઆઇડી ક્રાઇમની સ્ટેટ સાયબર ક્રાઇમની ટીમ દ્વારા તપાસ કરવાની સાથે ભોગ બનનારના નાણાં પરત આવે તે માટે પણ ખાસ કાર્યવાહી કરવામાં આવી હતી. જે અંતર્ગત સાયબર ક્રાઇમનો ભોગ બનેલા બે ફરિયાદીને છેતરપિંડીમાં ગયેલા નાણાં તાત્કાલિક ફ્રીઝ કરીને કુસ ૫.૫૧ કરોડ જેટલી રકમ પરત આપવામાં આવી હતી. આ છેતરપિડીમાં વડોદરાના એક સિનિયર સિટીઝનને ૪.૯૧ કરોડ અને અમદાવાદના એક સિનિયર સિટીઝનને ૪૮ લાખ પરત અપાવવામાં આવ્યા હતા. પોલીસે આ છેતરપિંડીના અન્ય કેસ સાથે તપાસ કરતા દેશમાં થયેલા ૮૦૪ કરોડની માતબર રકમની છેતરપિંડીનો પણ પર્દાફાશ કરાયો હતો. જેમાં આરોપીઓએ ૧૫૫૦ જેટલા સીમ કાર્ડનો ઉપયોગ કરીને દુબઇ, કમ્બોડિયા અને વિયેતનામમાં સક્રિય સાયબર માફિયાઓએ ભારતમાં સક્રિય એજન્ટોની મદદથી છેતરપિડી આચરી હતી. ગુજરાત સ્ટેટ સાયબર ક્રાઇમે આ કેસમાં ૧૦ આરોપીઓને સુરતમાંથી ઝડપીને તેમની પાસેથી ૬૫ મોબાઇલ ફોન, ૪૫૦ ડેબિટ કાર્ડ, ૭૦૦ સીમ કાર્ડ, ૫૫૦ બેંક એકાઉન્ટ અને ૧૬ પીઓએસ મશીન જપ્ત કર્યા હતા. ત્યારે સ્ટેટ સાયબર ક્રાઇમ અન્ય રાજ્યોની પોલીસની મદદથી આ કેસમાં વધુ વિગતો તપાસી રહી છે.
એકાઉન્ટ હોલ્ડરને કમિશનની લાલચ અપાતી હતી
કમ્બોડિયા, વિયેતનામ અને દુબઇમાં રહેલી ચાઇનીઝ ગેંગને ભારતમાં કરોડોનું કૌભાંડ આચરવા માટે બેંક એકાઉન્ટ અને સીમ કાર્ડની જરૂર રહે છે. આ માટે વિદેશમાં રહેતી ગેંગ દ્વારા ભારતમાં એજન્ટોનું મોટુ નેટવર્ક સેટઅપ કરવામાં આવ્યું છે. જેમાં છેતરપિંડીની રકમ મેળવવા માટે અલગ અલગ તબક્કે કમિશનનો દર નક્કી કર્યા બાદ પણ કુલ રકમની ૯૪ ટકા જેટલી રકમ વિદેશમા સક્રિય ગેંગને મળતી હતી. એકાઉન્ટ હોલ્ડરને ખાતામાં જમા થતી રકમના એક થી દોઢ ટકા જેટલુ કમિશન મળતું હતું.જ્યારે ખાતામાથી રકમ ટ્રાન્સફર કરવા માટે કામ કરતો વ્યક્તિ ચાર ટકા કમિશન પોતાના પાસે રાખીને તે નાણાં આગળ મોકલતો હતો. તેમજ સીમકાર્ડ આપનારને કાર્ડ દીઠ ૩૦૦ રૂપિયા કમિશન આપવામાં આવતું હતું. જે સીમકાર્ડ વિદેશમાં મોકલવામાં આવતા હતા.
